బీర్కూర్, జూలై 13 (డిడి9 వార్త): కామారెడ్డి జిల్లా బీర్కూర్ మండలం కిష్టాపూర్ గ్రామంలో ఎలాంటి ప్రభుత్వ అనుమతులు లేకుండానే మొరం అక్రమ తవ్వకాలు యథేచ్ఛగా కొనసాగుతున్నాయని గ్రామస్థులు తీవ్ర ఆరోపణలు చేస్తున్నారు. రాత్రింబవళ్లు భారీ యంత్రాలతో మొరం తవ్వి ట్రాక్టర్లు,టిప్పర్ల ద్వారా ఇతర ప్రాంతాలకు తరలిస్తున్నప్పటికీ సంబంధిత అధికారులు పట్టించుకోవడం లేదని వారు వాపోతున్నారు. ప్రభుత్వ నిబంధనలను బేఖాతరు చేస్తూ సాగుతున్న ఈ అక్రమ వ్యవహారం వల్ల ప్రభుత్వానికి లక్షల రూపాయల ఆదాయ నష్టం వాటిల్లడమే కాకుండా గ్రామంలోని రహదారులు పూర్తిగా దెబ్బతింటున్నాయని స్థానికులు ఆందోళన వ్యక్తం చేస్తున్నారు.గ్రామస్థుల కథనం ప్రకారం, అక్రమ తవ్వకాలకు పాల్పడుతున్న వారు ఎలాంటి భయం లేకుండా బహిరంగంగానే వ్యవహరిస్తున్నారు. వారిని ప్రశ్నించిన గ్రామస్థులను రెవెన్యూ,పోలీస్ మా చేతుల్లోనే ఉన్నారు... ఏం చేసుకుంటారో చేసుకోండి అంటూ బెదిరిస్తున్నారని ఆరోపిస్తున్నారు.ఈ వ్యాఖ్యలు స్థానిక ప్రజల్లో తీవ్ర ఆందోళనకు గురి చేస్తున్నాయని, అక్రమ తవ్వకాల వెనుక కొందరు ప్రభావశీలుల అండదండలు ఉన్నాయనే అనుమానాలను కూడా వ్యక్తం చేస్తున్నారు.గ్రామస్థులు పలుమార్లు సంబంధిత అధికారులకు, రెవెన్యూ శాఖకు, పోలీసులకు ఫిర్యాదులు చేసినప్పటికీ ఇప్పటివరకు ఎలాంటి ఫలితం కనిపించలేదని తెలిపారు. ఫిర్యాదుల అనంతరం కూడా యథావిధిగా మొరం తరలింపు కొనసాగుతుండటంతో అధికారుల పనితీరుపై అనుమానాలు వ్యక్తమవుతున్నాయని పేర్కొన్నారు.అక్రమ మొరం తవ్వకాల వల్ల గ్రామంలోని ప్రధాన రహదారులు గుంతలమయంగా మారాయని, భారీ వాహనాల రాకపోకల కారణంగా దుమ్ము, ధూళి విపరీతంగా ఎగసిపడుతూ ప్రజలు తీవ్ర ఇబ్బందులు పడుతున్నారని తెలిపారు. పాఠశాలలకు వెళ్లే విద్యార్థులు, వృద్ధులు, మహిళలు రహదారులపై ప్రయాణించేందుకు కూడా ఇబ్బందులు ఎదుర్కొంటున్నారని గ్రామస్థులు ఆవేదన వ్యక్తం చేశారు. వర్షాకాలంలో రహదారులు మరింత దెబ్బతిని ప్రమాదాలకు దారితీసే అవకాశం ఉందని హెచ్చరిస్తున్నారు.ఈ విషయమై బీర్కూర్ తహసీల్దార్‌ను సంప్రదించగా,కిష్టాపూర్ గ్రామంలో మొరం తవ్వకాలకు ఎలాంటి అనుమతులు ఇవ్వలేదు. అక్రమంగా తవ్వకాలు జరుగుతున్నట్లయితే వెంటనే పోలీసులకు సమాచారం ఇవ్వాలి. రెవెన్యూ, గనుల శాఖ, పోలీసు శాఖలతో కలిసి విచారణ నిర్వహించి నిబంధనల ప్రకారం చట్టపరమైన చర్యలు తీసుకుంటాం అని తెలిపారు.అయితే గ్రామస్థులు మాత్రం మాటలకే పరిమితం కాకుండా క్షేత్రస్థాయిలో చర్యలు తీసుకోవాలని కోరుతున్నారు. అక్రమ తవ్వకాల్లో ఉపయోగిస్తున్న జేసీబీలు,ట్రాక్టర్లు,టిప్పర్లను స్వాధీనం చేసుకుని బాధ్యులపై కఠిన చర్యలు తీసుకోవాలని డిమాండ్ చేస్తున్నారు. అలాగే ప్రభుత్వ భూములు, సహజ వనరులను కాపాడేందుకు జిల్లా యంత్రాంగం ప్రత్యేక దృష్టి సారించాలని కోరుతున్నారు.కిష్టాపూర్ గ్రామంలో కొనసాగుతున్న ఈ అక్రమ మొరం తవ్వకాలపై జిల్లా కలెక్టర్, గనుల శాఖ అధికారులు, రెవెన్యూ శాఖ మరియు పోలీసు అధికారులు వెంటనే స్పందించి సమగ్ర విచారణ చేపట్టి, అక్రమాలకు పాల్పడుతున్న వారిపై చట్టపరమైన చర్యలు తీసుకోవాలని గ్రామస్థులు విజ్ఞప్తి చేస్తున్నారు.ప్రభుత్వ ఆదాయానికి గండి కొడుతున్న ఇటువంటి అక్రమ కార్యకలాపాలను అరికట్టకపోతే భవిష్యత్తులో మరింత విస్తరించే ప్రమాదం ఉందని వారు హెచ్చరిస్తున్నారు.

రాబోయే పండుగల నేపథ్యంలో నిజామాబాద్ కమిషనరేట్ పరిధిలో పటిష్టమైన బందోబస్తు ఏర్పాటు చేయాలని సీపీ పి.సాయిచైతన్య అధికారులను ఆదేశించారు. బోధన్ డివిజన్ పోలీసు అధికారులతో నిర్వహించిన సమీక్షా సమావేశంలో ఆయన మాట్లాడుతూ నేరాల కట్టడికి ప్రత్యేక వ్యూహాలతో పనిచేయాలని సూచించారు. పాత నేరస్థులు, రౌడీషీటర్లపై నిరంతర నిఘా ఉంచాలని, సరిహద్దు ప్రాంతాల్లో వాహనాల తనిఖీలను కట్టుదిట్టం చేయాలని ఆయన పేర్కొన్నారు. మహిళల భద్రత కోసం షీ టీమ్స్, చీతా ఫోర్స్ బృందాలను అప్రమత్తంగా ఉంచడంతో పాటు రద్దీ ప్రాంతాల్లో నిఘా పెంచాలని ఆదేశించారు. డ్రగ్స్, గంజాయి వంటి అక్రమ వ్యాపారాలపై ఉక్కుపాదం మోపి, చట్ట వ్యతిరేక కార్యకలాపాలకు పాల్పడే వారిపై పీడీ యాక్ట్ వంటి కఠిన చర్యలు తీసుకోవాలని స్పష్టం చేశారు. అలాగే రోడ్డు ప్రమాదాల నివారణకు ప్రమాదకర ప్రాంతాలను గుర్తించి తక్షణమే భద్రతా చర్యలు చేపట్టాలని, ప్రజలకు ట్రాఫిక్ నియమాలపై అవగాహన కల్పించాలని సూచించారు. ఈ కార్యక్రమంలో ఏసీపీలు పి.శ్రీనివాస్, గురునాయుడు, సీఐలు వెంకట నారాయణ, విజయ్ బాబు, కృష్ణ ఎస్సైలు పాల్గొన్నారు.

బోధన్ ప్రభుత్వ జూనియర్ కళాశాలలో ఖాళీగా ఉన్న గెస్ట్ ఫాకల్టీ అధ్యాపక పోస్టులను వెంటనే భర్తీ చేయాలని డిమాండ్ చేస్తూ బీఆర్ఎస్వీ, బహుజన విద్యార్థి ఫోర్స్ (బీవీఎఫ్) ఆధ్వర్యంలో విద్యార్థులు ఆర్డీఓ కార్యాలయం ఎదుట ధర్నా నిర్వహించారు. ఈ సందర్భంగా విద్యార్థి సంఘాల నాయకులు వడ్ల సతీష్ చారి, సిరివెసు సంతోష్ మాట్లాడుతూ.. కళాశాలలో ఒకేషనల్ కోర్సు చదువుతున్న విద్యార్థులకు ఇంగ్లీష్, జనరల్ ఫౌండేషన్ కోర్స్ మరియు ఎలక్ట్రానిక్ అండ్ కమ్యూనికేషన్ టెక్నాలజీ సబ్జెక్టులు బోధించడానికి గత రెండు సంవత్సరాలుగా సంబంధిత అధ్యాపకులు లేక విద్యార్థులు తీవ్ర ఇబ్బందులు పడుతున్నారని ఆవేదన వ్యక్తం చేశారు.

​ప్రైవేట్ కళాశాలల్లో వృత్తి విద్యా కోర్సులు చదవాలంటే రూ. 18 వేల నుంచి రూ. 20 వేల వరకు ఖర్చవుతుందని, అలాగే ఫీజు రీయింబర్స్మెంట్ సకాలంలో విడుదల కాక మెమోలు, టీసీలు పొందడంలో విద్యార్థులు ఇబ్బందులు ఎదుర్కొంటున్నారని పేర్కొన్నారు. నిజామాబాద్ జిల్లాలోని కొన్ని జూనియర్ కళాశాలల్లో 100 మంది విద్యార్థులు కూడా లేకపోయినా అక్కడ అధ్యాపకులు ఉన్నారని, కానీ 345 మంది విద్యార్థులున్న బోధన్ కళాశాలలో అధ్యాపకులు లేకపోవడం జిల్లా ఇంటర్మీడియట్ విద్యాశాఖ అధికారుల నిర్లక్ష్యానికి నిదర్శనమని వారు విమర్శించారు. వచ్చే వారం రోజుల్లోగా గెస్ట్ ఫాకల్టీని నియమించకపోతే పెద్ద ఎత్తున ఉద్యమం చేస్తామని హెచ్చరించారు. ఈ కార్యక్రమంలో వడ్ల సతీష్ చారి, సిరివెసు సంతోష్‌తో పాటు విద్యార్థులు పాల్గొన్నారు.

కళ్లముందే పెరిగి పెద్దవాడైన కొడుకు.. ఉన్నత చదువులు చదివి, కుటుంబానికి అండగా ఉంటాడని ఆశపడ్డ తల్లిదండ్రులకు ఆశలన్నీ అడియాసలయ్యాయి. ఐదేళ్ల క్రితం ఉపాధి కోసం కువైట్‌ వెళ్లిన నిజామాబాద్ జిల్లా డిచ్‌పల్లి మండలం కోరట్‌పల్లి తండాకు చెందిన గుగ్లోత్ కైలాష్‌.. ఇప్పుడు విగతజీవిగా మారాడు. అదీ మాతృభూమికి వేల మైళ్ల దూరంలో ఉన్న ఎడారిలో శవమై తేలడం ఆ కుటుంబాన్ని తీరని శోకంలో ముంచెత్తింది.

​ఎడారిలో మౌన రోదన

మార్చి 19.. ఆ రోజుతో కైలాష్‌ గొంతు తల్లిదండ్రులకు వినిపించలేదు. కొడుకు కనిపించడం లేదని ఆ తల్లిదండ్రులు నాలుగు నెలలుగా పడ్డ ఆవేదన అంతా ఇంతా కాదు. కంటికి రెప్పలా పెంచుకున్న కైలాష్‌ కోసం వారు పడ్డ తపన ఆ దేవుడికి కూడా కనిపించలేదా అన్నట్టుగా ఉంది పరిస్థితి. అసలు నిజం తెలిసేసరికి వారి గుండెలు బద్దలయ్యాయి. కైలాష్‌ చనిపోవడమే కాకుండా, తోటి మనిషిని మనుషులు పశువుల్లా ఎడారి ఇసుకలో పాతిపెట్టారన్న వార్త మానవత్వాన్ని మంటగలిపింది.

​తోటివాడే కాలమయ్యాడు

నిజానికి, కైలాష్‌కు తోడుగా ఉంటాడనుకున్న నిందితుడు కూడా అదే డిచ్‌పల్లి మండలం సాంపల్లికి చెందినవాడు. సొంత ప్రాంతం నుంచి వెళ్లిన వ్యక్తి, తోటివాడిని కాపాడాల్సింది పోయి.. ప్రాణం పోయాక ఆ శవాన్ని కూడా ఎడారిలో అనాథలా పాతిపెట్టడం దారుణం. భయం అన్న ముసుగులో చేసిన ఈ అమానుషం ఇప్పుడు రెండు తండాల్లో విషాదాన్ని నింపింది.

​తీరని శూన్యం

సివిల్ ఇంజినీరింగ్ చదివి, కుటుంబానికి కొండంత అండగా నిలవాల్సిన యువకుడు ఇలా మధ్యలోనే ప్రాణాలు కోల్పోవడం కోరట్‌పల్లి తండాను శోకసంద్రంలో ముంచేసింది. నిందితుడి తండ్రి స్వదేశానికి పారిపోయి వచ్చినా, కైలాష్‌ మాత్రం తిరిగిరాని లోకాలకు వెళ్ళిపోయాడు. కొడుకు తిరిగి వస్తాడన్న ఆశతో ఉన్న తల్లిదండ్రుల కళ్లలో నీళ్లు ఇప్పుడు ఆరని గాయాలయ్యాయి. ఈ దారుణానికి పాల్పడిన వారిపై చట్టం కఠినంగా స్పందించాలని, తమకు న్యాయం చేయాలని ఆ కుటుంబం వేడుకుంటోంది.

నిజామాబాద్ జిల్లా బోధన్ పట్టణంలోని ఏకచక్ర నగర్‌లో గంగపుత్ర మరాఠా సంఘం ఆధ్వర్యంలో బోనాల పండుగ మంగళవారం ఘనంగా జరిగింది. కాలనీకి చెందిన మహిళలు, కులస్తులు డప్పు వాయిద్యాల నడుమ బోనాలను నెత్తిన ధరించి ఊరేగింపుగా అమ్మవారి ఆలయానికి చేరుకున్నారు. అనంతరం అమ్మవారికి ప్రత్యేక పూజలు నిర్వహించి భక్తిశ్రద్ధలతో మొక్కులు చెల్లించుకున్నారు. ఈ కార్యక్రమంలో సంఘం అధ్యక్షులు గటుమల్ సాగర్, వార్డు కౌన్సిలర్ గుమ్ముల అశోక్ రెడ్డి, సంఘ సభ్యులు సుభాష్, దశరథ్, తానాజీ, సీతారాం, గణేష్, దీపక్, పవన్, బాపూజీ, మహిళలు, చిన్నారులు పాల్గొన్నారు.

మన ఊరు - మన భద్రత – మన బాధ్యత’ అనే నినాదంతో పట్టణ ప్రజల్లో చైతన్యం నింపేందుకు బోధన్ పోలీసులు వినూత్న కార్యక్రమాన్ని చేపట్టారు. ఇందులో భాగంగా బోధన్ పట్టణంలోని రద్దీగా ఉండే పాత బస్టాండ్ ఆవరణలో ఎస్సై హబీబ్ ఆధ్వర్యంలో ప్రత్యేక అవగాహన సదస్సు నిర్వహించారు. మారుతున్న సాంకేతికతతో పాటు నేరస్తుల శైలి కూడా మారుతోందని, దీనిని గమనించి ప్రజలు అప్రమత్తంగా ఉండాలని ఆయన హితవు పలికారు.

​ఈ సందర్భంగా ఎస్సై మాట్లాడుతూ.... నేడు ప్రతి ఒక్కరి చేతిలో స్మార్ట్‌ఫోన్ ఉండటంతో సైబర్ నేరగాళ్లు అమాయకులను లక్ష్యంగా చేసుకుంటున్నారని ఆందోళన వ్యక్తం చేశారు. బ్యాంక్ ఖాతా వివరాలు, పిన్ నంబర్లు, ముఖ్యంగా ఓటీపీ లను ఎవరితోనూ పంచుకోవద్దని స్పష్టం చేశారు. తెలియని వ్యక్తులు పంపే మెసేజ్‌లు, ఈ-మెయిల్స్, ఆకర్షణీయమైన ఆఫర్ల లింకులను క్లిక్ చేయవద్దని ఆయన హెచ్చరించారు. ఒకవేళ పొరపాటున ఆన్‌లైన్ మోసానికి గురైతే అధైర్యపడకుండా, వెంటనే జాతీయ సైబర్ క్రైమ్ హెల్ప్‌లైన్ నంబర్ 1930కు కాల్ చేసి వివరాలు నమోదు చేయాలని సూచించారు. దీనివల్ల బాధితుల సొమ్మును రికవరీ చేసే అవకాశం ఉంటుందని ఆయన పేర్కొన్నారు.

​అనంతరం ట్రాఫిక్ నిబంధనల ఆవశ్యకతపై ఎస్సై హబీబ్ మాట్లాడుతూ... రోడ్డు భద్రత అనేది ప్రతి పౌరుడి బాధ్యత అని గుర్తు చేశారు. ద్విచక్ర వాహనదారులు ప్రాణ రక్షణ కోసం తప్పనిసరిగా హెల్మెట్ ధరించాలని, వాహనం నడిపేటప్పుడు సెల్ ఫోన్ మాట్లాడటం, అతివేగం, మద్యం సేవించి వాహనం నడపడం వంటివి ప్రమాదకరమని హెచ్చరించారు. ట్రాఫిక్ నిబంధనలను ఉల్లంఘిస్తే జరిమానాలు కట్టాల్సి రావడమే కాకుండా, ప్రాణాపాయం కూడా సంభవించే అవకాశం ఉందని ఆయన ఆవేదన వ్యక్తం చేశారు. వాహనదారులు తమ వెంట డ్రైవింగ్ లైసెన్స్, ఇన్సూరెన్స్ వంటి పత్రాలను ఉంచుకోవాలని సూచించారు. ఈ కార్యక్రమంలో స్థానిక ప్రజలు, వాహనదారులు, పోలీసు, ట్రాఫిక్ పోలీసు సిబ్బంది పాల్గొన్నారు.

ముఖ్యమంత్రి రేవంత్ రెడ్డి అధ్యక్షతన జరిగిన మంత్రిమండలి సమావేశంలో కీలక నిర్ణయాలు తీసుకున్నారు. ప్రభుత్వ పాఠశాలలు, జూనియర్ కళాశాలల్లో విద్యార్థులతో పాటు సుమారు 1.5 లక్షల మంది ఉపాధ్యాయులు, లెక్చరర్లు, సిబ్బందికి కూడా అల్పాహారంతో పాటు మధ్యాహ్న భోజనం అందించాలని మంత్రివర్గం నిర్ణయించింది.

కేంద్రం ప్రవేశపెట్టిన వీబీజీ రామ్‌జీ పథకం నిరుపేదల హక్కులను హరించేలా ఉందని భావిస్తూ, ఈ అంశంపై సుప్రీంకోర్టును ఆశ్రయించాలని మంత్రివర్గం నిర్ణయించింది. కేంద్రం రాష్ట్రాల భిన్నాభిప్రాయాలను పట్టించుకోకుండా ఈ పథకాన్ని అమలు చేస్తున్నందున, ఉపాధి హామీ కూలీలకు నష్టం జరగకూడదనే ఉద్దేశంతో అనివార్య పరిస్థితుల్లో దీనిని రాష్ట్రంలో కూడా కొనసాగించాలని నిర్ణయించారు.

వైద్య రంగంలో భారీగా ఉద్యోగ నియామకాలు చేపట్టేందుకు కూడా మంత్రివర్గం ఆమోదం తెలిపింది. సనత్‌నగర్, ఎల్‌బీ నగర్, అల్వాల్ టిమ్స్ మరియు వరంగల్ సూపర్ స్పెషాలిటీ ఆసుపత్రుల్లో డాక్టర్లు, వైద్య సిబ్బంది కోసం 6,278 పోస్టులను మంజూరు చేశారు. ఈ ఆసుపత్రులను నిమ్స్ తరహాలో అభివృద్ధి చేయడంతో పాటు, వైద్య సేవలకు ముఖ్యమంత్రి సహాయనిధి నుంచి ఎల్‌ఓసీలు జారీ చేయాలని నిర్ణయించారు.

హైదరాబాద్ మూసీ రివర్‌ఫ్రంట్ ప్రాజెక్టులో భాగంగా ఫేజ్-1లో గాంధీ సరోవర్ వరకు 21 కిలోమీటర్ల మేర పనులు పూర్తి చేసేందుకు పరిపాలనా అనుమతులు మంజూరు చేశారు. ఈ ప్రాజెక్టు అభివృద్ధి కోసం రూ. 7,345 కోట్లు మంజూరు చేస్తూ మంత్రివర్గం ఆమోదం తెలిపిందని మంత్రులు పొంగులేటి శ్రీనివాస రెడ్డి, ధనసరి అనసూయ సీతక్క, అడ్లూరి లక్ష్మణ్ కుమార్ వెల్లడించారు.

నిజామాబాద్ జిల్లా రెంజల్ మండల కేంద్రంలోని కస్తూర్బా గాంధీ బాలికల విద్యాలయాన్ని గురువారం జిల్లా కలెక్టర్ ఇలా త్రిపాఠి అకస్మాత్తుగా తనిఖీ చేశారు. పాఠశాల ఆవరణ అపరిశుభ్రంగా ఉండటంపై ఆమె ఆగ్రహం వ్యక్తం చేశారు. విద్యార్థుల భద్రతను గమనించి, పరిసరాలను వెంటనే శుభ్రం చేయించాలని, ఆర్‌ఓ ప్లాంట్‌ మరమ్మతులు చేపట్టాలని అధికారులను ఆదేశించారు. ప్రభుత్వం నిర్దేశించిన మెనూ ప్రకారం పౌష్టికాహారాన్ని అందించాలని, బయటి వ్యక్తుల రాకపై ఆంక్షలు విధించాలని సూచించారు. ఈ కార్యక్రమంలో తహసీల్దార్ శ్రవణ్, ఎంపీడీఓ కమలాకర్, స్పెషల్ ఆఫీసర్ శ్యామల పాల్గొన్నారు.

నిజామాబాద్‌ జిల్లాలో కలెక్టర్‌ సంతకం ఫోర్జరీ ఉదంతం తీవ్ర కలకలం రేపింది. వాట్సాప్‌తో పాటు ఇతర సామాజిక మాధ్యమాల్లో పి.శ్రీనివాస్‌ అనే వ్యక్తి పేరిట నకిలీ మీడియా అక్రెడిటేషన్‌ కార్డు చెలామణి అవుతున్నట్లు అధికారుల దృష్టికి వచ్చింది. ఈ నకిలీ కార్డును సృష్టించేందుకు జిల్లా కలెక్టర్‌ ఇలా త్రిపాఠి సంతకాన్ని ఫోర్జరీ చేసినట్లు గుర్తించారు. దీనిపై స్పందించిన నిజామాబాద్‌ జిల్లా పౌర సంబంధాల అధికారి ఎన్‌.పద్మశ్రీ జిల్లా పోలీసులకు లిఖితపూర్వకంగా ఫిర్యాదు చేశారు. సదరు అక్రెడిటేషన్‌ కార్డును సమాచార పౌర సంబంధాల శాఖ నిజామాబాద్ జిల్లా కార్యాలయం నుంచి జారీ చేయలేదని డీపీఆర్‌ఓ పద్మశ్రీ ఒక ప్రకటనలో స్పష్టం చేశారు. కలెక్టర్‌ సంతకాన్ని ఫోర్జరీ చేసి నకిలీ కార్డును తయారు చేసిన సదరు వ్యక్తిపై చట్టపరమైన కఠిన చర్యలు తీసుకోవాలని ఆమె పోలీసులను కోరారు. ఎవరైనా ఈ తరహాలో నకిలీ అక్రెడిటేషన్‌ కార్డులను తయారు చేసినా, లేదా వాటిని వినియోగించినా చట్టరీత్యా కఠిన చర్యలు తీసుకుంటామని ఆమె ఈ సందర్భంగా హెచ్చరించారు.

బీర్కూర్, జూన్ 28(డిడి9 వార్త): మండల కేంద్రంలో నిర్వహించిన పల్స్ పోలియో కార్యక్రమాన్ని గ్రామ సర్పంచ్ అరిగే ధర్మతేజ ప్రారంభించారు.ఈ సందర్భంగా చిన్నారులకు పోలియో చుక్కలు వేయించి కార్యక్రమాన్ని ప్రారంభించారు.ఐదేళ్ల లోపు పిల్లలందరికీ తప్పనిసరిగా పోలియో చుక్కలు వేయించాలని ఆయన తల్లిదండ్రులకు సూచించారు. పోలియో నిర్మూలనలో ప్రజల భాగస్వామ్యం ఎంతో అవసరమని, ప్రతి చిన్నారికి చుక్కలు వేయించడం ద్వారా ఆరోగ్యవంతమైన సమాజ నిర్మాణం సాధ్యమవుతుందని తెలిపారు.కార్యక్రమంలో వైద్య సిబ్బంది, ఆశా కార్యకర్తలు, అంగన్‌వాడీ సిబ్బంది, గ్రామ ప్రజలు పాల్గొన్నారు.

బాన్సువాడ,జూన్ 26(డిడి9 వార్త): ముఖ్యమంత్రి సహాయనిధి (సీఎంఆర్) ద్వారా మంజూరైన చెక్కులను ఎమ్మెల్యే పోచారం శ్రీనివాస్ రెడ్డి తన నివాసంలో లబ్ధిదారులకు పంపిణీ చేశారు. దామరంచ, బీర్కూర్ గ్రామాలకు చెందిన అర్హులైన లబ్ధిదారులకు చెక్కులను అందజేశారు.ప్రజలకు ప్రభుత్వం అందిస్తున్న సంక్షేమ పథకాల ప్రయోజనాలు ప్రతి అర్హుడికి చేరేలా కృషి చేస్తున్నామని ఆయన తెలిపారు.ఈ కార్యక్రమంలో రాష్ట్ర ఆగ్రోస్ ఇండస్ట్రీస్ చైర్మన్ కాసుల బాలరాజు, దామరంచ సర్పంచ్ బోయిని శంకర్, కాంగ్రెస్ పార్టీ జిల్లా కార్యదర్శి మేకల విట్టల్, యువనాయకులు శశికాంత్, కొరిమె రఘు తదితరులు పాల్గొన్నారు.

బీర్కూర్, జూన్ 22(డిడి9 వార్త):

బీర్కూర్ మండలం బరంగ్ ఎడ్గి గ్రామంలో గత కొన్ని సంవత్సరాలుగా మురికి మట్టి పేరుకుపోయి ప్రజలకు ఇబ్బందులు కలిగిస్తున్న కాలువల శుభ్రత పనులను గ్రామ పంచాయతీ పాలకవర్గం చేపట్టింది. గత తొమ్మిది రోజులుగా సర్పంచ్ అనిల్ కుమార్ రెంజర్ల ఆధ్వర్యంలో పారిశుధ్య కార్యక్రమాలు కొనసాగుతున్నాయి.గ్రామంలోని మురికి కాలువలను శుభ్రం చేయడం ద్వారా ప్రజలకు మెరుగైన పరిశుభ్ర వాతావరణం కల్పించడమే లక్ష్యంగా ఈ కార్యక్రమాన్ని నిర్వహిస్తున్నట్లు తెలిపారు.ఈ కార్యక్రమంలో ఉప సర్పంచ్ ప్రవీణ్, వార్డు సభ్యులు శివకళ, బుమవ్వ, సాయిలు, గంగవ్వ, బాలేష్, యాదవరావు, అనిల్, హన్మండ్లు, రేణుక, పంచాయతీ సెక్రటరీ గురునాథ్, కరోబారి పర్వయ్య పాల్గొన్నారు.గ్రామంలో పారిశుధ్య పనులు నిరంతరం కొనసాగిస్తూ ప్రజారోగ్య పరిరక్షణకు కృషి చేస్తామని పాలకవర్గం సభ్యులు తెలిపారు.

బాన్సువాడ, జూన్ 21(డిడి9 వార్త): అంతర్జాతీయ యోగా దినోత్సవాన్ని పురస్కరించుకుని బాన్సువాడలోని యస్ఎంబీ ఫంక్షన్ హాల్‌లో ఆర్డీవో రవీందర్ రెడ్డి ఆధ్వర్యంలో, ఆయుష్ విభాగం నిర్వహణలో యోగా దినోత్సవ వేడుకలు ఘనంగా నిర్వహించారు.ఈ కార్యక్రమంలో ప్రజాప్రతినిధులు, ఉపాధ్యాయులు, ప్రభుత్వ ఉద్యోగులు, నర్సింగ్ కళాశాల విద్యార్థులు పెద్ద సంఖ్యలో పాల్గొని యోగా సాధన చేశారు. యోగా ద్వారా ఆరోగ్యకరమైన జీవన విధానాన్ని అలవరచుకోవాలని ప్రతిజ్ఞ చేశారు.ఈ సందర్భంగా ఆర్డీవో రవీందర్ రెడ్డి మాట్లాడుతూ, యోగ భారతదేశం ప్రపంచానికి అందించిన అమూల్యమైన వరమని, ప్రతి ఒక్కరూ దైనందిన జీవితంలో యోగను భాగం చేసుకుంటే శారీరక, మానసిక ఆరోగ్యంతో పాటు ఆత్మవిశ్వాసం కూడా పెరుగుతుందని తెలిపారు. నేటి ఒత్తిడి జీవనశైలిలో యోగ ఉత్తమ పరిష్కార మార్గమని పేర్కొన్నారు.ఈ కార్యక్రమంలో జిల్లా అధ్యక్షులు కుశాల్, ఆయుష్ విభాగం వాలంటరీ శ్రీనివాస్ గౌడ్, కాసుల రోహిత్, కాలెక్, గౌస్, మంద ప్రవీణ్ కుమార్, లక్క నరహరి, నర్వ శ్రీనివాస్, చందర్ తదితరులు పాల్గొన్నారు. ప్రజల్లో యోగపై అవగాహన పెంచేందుకు నిర్వహించిన ఈ కార్యక్రమం విజయవంతంగా ముగిసింది.

బీర్కూర్, జూన్ 21(డిడి9 వార్త):

అంతర్జాతీయ యోగ దినోత్సవం సందర్భంగా బీర్కూర్ మండలం బరంగేడ్గి గ్రామంలో భగత్ సింగ్ శాఖ ఆధ్వర్యంలో యోగా దినోత్సవ కార్యక్రమం నిర్వహించారు.ఈ కార్యక్రమంలో నాగేళ్ల సాయికిరణ్ ఆధ్వర్యంలో గ్రామ యువతతో పాటు చిన్నారులు పాల్గొని యోగా ప్రాముఖ్యతను తెలుసుకున్నారు. శారీరక, మానసిక ఆరోగ్యానికి యోగా ఎంతో ఉపయోగకరమని నిర్వాహకులు తెలిపారు.యువత రోజువారీ జీవితంలో యోగాను అలవాటు చేసుకోవాలని సూచించారు.

బీర్కూర్, జూన్ 18(డిడి9 వార్త):

బీర్కూర్ మండల కేంద్రంలోని బాజాన్ చెరువులో అక్రమంగా మట్టి తవ్వకాలు, తరలింపు జరుగుతోందని స్థానిక ప్రజలు ఆరోపిస్తున్నారు. గ్రామానికి చెందిన కొందరు వ్యక్తులు ఎలాంటి అనుమతులు లేకుండానే చెరువులోని మట్టిని టిప్పర్లు, ట్రాక్టర్ల ద్వారా విచ్చలవిడిగా తరలిస్తున్నారని వారు పేర్కొన్నారు.ప్రతిరోజూ ఉదయం నుంచి సాయంత్రం వరకు మట్టి రవాణా కొనసాగుతున్నప్పటికీ సంబంధిత అధికారులు చూసీ చూడనట్లు వ్యవహరిస్తున్నారని గ్రామస్థులు విమర్శిస్తున్నారు. సాయంత్రం 06 గంటలు దాటినా మట్టి తరలింపు కొనసాగుతుండటంతో పలు అనుమానాలు వ్యక్తమవుతున్నాయని తెలిపారు.చెరువుల పరిరక్షణ బాధ్యత ఉన్న అధికారులు అక్రమ మట్టి దందాపై ఎందుకు స్పందించడం లేదని ప్రజలు ప్రశ్నిస్తున్నారు. ఈ వ్యవహారంలో కొందరు అధికారులకు ముడుపులు ముట్టాయా అనే అనుమానాలను కూడా స్థానికులు వ్యక్తం చేస్తున్నారు.బాజాన్ చెరువులో జరుగుతున్న అక్రమ మట్టి తవ్వకాలు, తరలింపుపై ఉన్నతాధికారులు వెంటనే స్పందించి సమగ్ర విచారణ చేపట్టాలని, బాధ్యులపై కఠిన చర్యలు తీసుకోవాలని గ్రామస్థులు డిమాండ్ చేస్తున్నారు. చెరువు పరిరక్షణకు అవసరమైన చర్యలు తీసుకుని అక్రమ మట్టి దందాకు అడ్డుకట్ట వేయాలని కోరుతున్నారు.

బీర్కూర్, జూన్ 17(డిడి9 వార్త):

బీర్కూర్ ఎంపీడీవో కార్యాలయంలో సూపరింటెండెంట్‌గా విధులు నిర్వహించిన భాను ప్రకాష్‌తో పాటు వివిధ గ్రామపంచాయతీలలో పనిచేసిన కార్యదర్శులు ఇటీవల బదిలీపై ఇతర మండలాలకు వెళ్లిన సందర్భంగా వారికి ఘనంగా సన్మానం నిర్వహించారు.బుధవారం బీర్కూర్ ఎంపీడీవో కార్యాలయంలో ఏర్పాటు చేసిన కార్యక్రమంలో ఎంపీడీవో శ్రీనిధి, ఎంపీవో మహిబూబ్, ఏపీవో అక్మల్, ఏఎంసీ వైస్ చైర్మన్ యామ రాములు, సర్పంచులు బోయిని శంకర్, ధర్మతేజ, అప్పారావు, దేవీసింగ్, బాన్సువాడ మనెవ్వ, మాజీ ఎంపీపీ రఘు, బస్వారాజ్ పటేల్, కనిగిరి కాశీరాం, రాచప్ప పటేల్‌ ఆయాగ్రామాల సెక్రెట్రీలతో పాటు వివిధ రాజకీయ పార్టీల నాయకులు పాల్గొన్నారు.ఈ సందర్భంగా బదిలీపై వెళ్లిన అధికారులను, కార్యదర్శులను శాలువాలతో సన్మానించి జ్ఞాపికలు అందజేశారు. బీర్కూర్ మండల అభివృద్ధికి వారు అందించిన సేవలను కొనియాడుతూ, భవిష్యత్‌లో కూడా ప్రజలకు మరింత మెరుగైన సేవలు అందించాలని ఆకాంక్షించారు.సన్మానితులు మాట్లాడుతూ బీర్కూర్ మండల ప్రజాప్రతినిధులు, అధికారులు, సిబ్బంది అందించిన సహకారాన్ని ఎప్పటికీ మరువలేమని తెలిపారు. కార్యక్రమంలో పలువురు అధికారులు, గ్రామపంచాయతీ సిబ్బంది, ప్రజాప్రతినిధులు పాల్గొన్నారు.

బీర్కూర్, జూన్ 17(డిడి9 వార్త):

బీర్కూర్ మండలం బరంగేడ్గి గ్రామంలో సర్పంచ్ అనిల్ కుమార్ ఆధ్వర్యంలో గత మూడు రోజులుగా మురికి కాలువల శుభ్రత పనులు చేపడుతున్నారు. గ్రామంలో పారిశుద్ధ్యాన్ని మెరుగుపర్చడం, వర్షాకాలంలో నీటి నిల్వలు, దోమల వ్యాప్తిని నివారించడం లక్ష్యంగా ఈ కార్యక్రమాన్ని నిర్వహిస్తున్నారు.ఈ సందర్భంగా సర్పంచ్ అనిల్ కుమార్ మాట్లాడుతూ గ్రామ ప్రజల ఆరోగ్య పరిరక్షణకు పారిశుద్ధ్యం ఎంతో ముఖ్యమని తెలిపారు. గ్రామంలోని ప్రధాన వీధులు, కాలనీల్లో ఉన్న మురికి కాలువలను పూర్తిగా శుభ్రం చేసి, నీటి ప్రవాహానికి ఎలాంటి ఆటంకాలు లేకుండా చర్యలు తీసుకుంటున్నామని చెప్పారు.గ్రామ ప్రజలు కూడా తమ పరిసరాలను పరిశుభ్రంగా ఉంచాలని, చెత్తను కాలువల్లో వేయకుండా సహకరించాలని ఆయన కోరారు. ఈ కార్యక్రమంలో గ్రామ పంచాయతీ వార్డు మెంబర్లు లక్కపల్లి హనుమండ్లు, వడ్ల యాదవరావు, కారోబారి పర్వయ్య, సిబ్బంది పాల్గొన్నారు.

బీర్కూర్, జూన్ 17(డిడి9 వార్త):

బీర్కూర్ మండల కేంద్రంలోని పశువైద్య ఆసుపత్రిలో పశువైద్యాధికారి డాక్టర్ విజయ్ ఆధ్వర్యంలో మాంసం విక్రయ దుకాణదారులతో ప్రత్యేక సమావేశం నిర్వహించారు.ఈ సమావేశంలో గ్రామ సర్పంచ్ అరిగే ధర్మతేజ ముఖ్య అతిథిగా పాల్గొన్నారు.ఈ సందర్భంగా సర్పంచ్ అరిగే ధర్మతేజ మాట్లాడుతూ ప్రజల ఆరోగ్యాన్ని దృష్టిలో ఉంచుకుని ఆరోగ్యంగా ఉన్న మేకల మాంసాన్ని మాత్రమే విక్రయించాలని మాంసం దుకాణదారులకు సూచించారు.అనారోగ్యానికి గురైన లేదా నాణ్యత లేని మాంసాన్ని విక్రయించకుండా నిబంధనలు పాటించాలని కోరారు.పశువైద్యాధికారి డాక్టర్ విజయ్ మాట్లాడుతూ మాంసం విక్రయానికి ముందు పశువుల ఆరోగ్య పరిస్థితిని పరిశీలించడం, పరిశుభ్రత ప్రమాణాలను పాటించడం ద్వారా ప్రజారోగ్యాన్ని కాపాడవచ్చని తెలిపారు.ఈ కార్యక్రమంలో ఈవో గంగారం, మాంసం విక్రయ దుకాణదారులు హుస్సేన్, గణేష్, శంకర్, నర్సుజీ తదితరులు పాల్గొన్నారు.

బీర్కూర్, జూన్ 17(డిడి9 వార్త):

బీర్కూర్ మండలానికి నూతనంగా వెటర్నరీ అసిస్టెంట్ సర్జన్‌గా బాధ్యతలు స్వీకరిస్తున్న డాక్టర్ బండి విజయ్‌ను బీర్కూర్ లయన్స్ క్లబ్ ఆధ్వర్యంలో ఘనంగా సన్మానించి శుభాకాంక్షలు తెలిపారు.ఈ సందర్భంగా మండలంలోని పశువులతో పాటు గ్రామాల్లో సంచరించే గోవులకు మెరుగైన వైద్య సేవలు అందించడం, పశువైద్య పరీక్షలను క్రమం తప్పకుండా నిర్వహించడం, పశుసంవర్థక రంగ అభివృద్ధికి తీసుకోవాల్సిన చర్యలపై చర్చించారు.డాక్టర్ బండి విజయ్ మాట్లాడుతూ పశువుల ఆరోగ్య పరిరక్షణకు ప్రాధాన్యత ఇస్తూ రైతులకు అందుబాటులో ఉండి నాణ్యమైన సేవలు అందిస్తానని తెలిపారు.ఈ కార్యక్రమంలో బీర్కూర్ లయన్స్ క్లబ్ అధ్యక్షులు సితలే రమేష్, సీనియర్ లయన్ సభ్యులు ఎం.ఏ. రషీద్, మేకల విఠల్, కిషోర్ ప్రభుదాస్ తదితరులు పాల్గొన్నారు.

బీర్కూర్, జూన్ 17(డిడి9 వార్త):

బీర్కూర్ మండలంలోని అన్ని ప్రైవేటు పాఠశాలల యాజమాన్యాలతో మండల విద్యాశాఖ అధికారి (ఎంఈవో) వెంకన్న విద్యాశాఖ కార్యాలయంలో ప్రత్యేక సమావేశం నిర్వహించారు. ఈ సందర్భంగా ఆయన మాట్లాడుతూ, ప్రభుత్వం నిర్దేశించిన నియమ నిబంధనలకు విరుద్ధంగా ఏ పాఠశాల యాజమాన్యం వ్యవహరించినా కఠిన చర్యలు తప్పవని హెచ్చరించారు.విద్యార్థుల నుంచి నోట్‌బుక్స్, యూనిఫాంలు, అధిక ఫీజులు లేదా డొనేషన్లు బలవంతంగా వసూలు చేయడం చట్ట విరుద్ధమని స్పష్టం చేశారు. ప్రభుత్వ మార్గదర్శకాలను ఉల్లంఘిస్తూ తల్లిదండ్రులపై అదనపు ఆర్థిక భారం మోపే చర్యలకు పాల్పడితే సంబంధిత పాఠశాలలపై చట్టరీత్యా చర్యలు తీసుకుంటామని తెలిపారు.అలాగే విద్యా శాఖ నిబంధనలను అతిక్రమించిన వారిపై కేసులు నమోదు చేసి, చట్టపరమైన శిక్షలు విధించేందుకు వెనుకాడబోమని హెచ్చరించారు. ప్రైవేటు పాఠశాలల యాజమాన్యాలు ప్రభుత్వ ఆదేశాలను తప్పనిసరిగా పాటించి, విద్యార్థులు మరియు తల్లిదండ్రుల ప్రయోజనాలను దృష్టిలో ఉంచుకుని వ్యవహరించాలని ఎంఈవో వెంకన్న సూచించారు.

బీర్కూర్, జూన్ 11(డిడి9 వార్త):

మండలంలోని బరంగ్ ఏడ్గి గ్రామంలో ప్రభుత్వ పాఠశాల ఉపాధ్యాయులు గాజుల సంతు, మారుతీ ఆధ్వర్యంలో బడిబాట కార్యక్రమాన్ని నిర్వహించారు. గ్రామంలోని వీధుల్లో పర్యటిస్తూ తల్లిదండ్రులు, విద్యార్థులకు ప్రభుత్వ పాఠశాలల్లో అందుతున్న నాణ్యమైన విద్య, ఉచిత పాఠ్యపుస్తకాలు, యూనిఫాంలు, మధ్యాహ్న భోజనం తదితర సౌకర్యాల గురించి వివరించారు.ఈ సందర్భంగా పాఠశాల వయస్సు కలిగిన ప్రతి చిన్నారిని పాఠశాలలో చేర్పించాలని తల్లిదండ్రులను కోరారు. విద్యార్థుల భవిష్యత్తు కోసం విద్య ఎంతో ముఖ్యమని, ప్రభుత్వ పాఠశాలల్లో ఉత్తమ విద్యా అవకాశాలు అందుబాటులో ఉన్నాయని తెలిపారు.గ్రామ ప్రజలు, తల్లిదండ్రులు కార్యక్రమానికి సహకరించగా, ఉపాధ్యాయులు విద్యార్థుల నమోదు పెంపునకు కృషి చేయాలని సంకల్పించారు.ఈ కార్యక్రమంలో ఆత్మ కమిటీ డైరెక్టర్ సందుల రవి, విద్యార్థులు పాల్గొన్నారు.

బాన్సువాడ, జూన్ 06 (డిడి9 వార్త):

బాన్సువాడ పట్టణంలోని పోచారం నివాసంలో తెలంగాణ రాష్ట్ర వ్యవసాయ సలహాదారులు, బాన్సువాడ ఎమ్మెల్యే పోచారం శ్రీనివాస్ రెడ్డిను బీర్కూర్ మండలంలోని బరంగ్ ఏడ్గి గ్రామానికి చెందిన కాంగ్రెస్ పార్టీ నాయకులు, కార్యకర్తలు శనివారం మర్యాదపూర్వకంగా కలిశారు. ఈ సందర్భంగా ప్రాంతీయ అభివృద్ధి, వ్యవసాయ రంగ సమస్యలు, ప్రజా సంక్షేమ కార్యక్రమాలు, గ్రామీణాభివృద్ధి అంశాలపై ఆయనతో విస్తృతంగా చర్చించారు.అనంతరం బరంగ్ ఏడ్గి గ్రామానికి చెందిన సందుల రవిని ఆత్మ కమిటీ డైరెక్టర్‌గా నియమించిన సందర్భంగా నాయకులు హర్షం వ్యక్తం చేశారు. ఈ సందర్భంగా ఎమ్మెల్యే పోచారం శ్రీనివాస్ రెడ్డితో పాటు తెలంగాణ ఆగ్రో ఇండస్ట్రీస్ చైర్మన్ కాసుల బాలరాజ్లను శాలువాలతో ఘనంగా సన్మానించి తమ కృతజ్ఞతలు తెలియజేశారు.ప్రజా సేవలో వారి కృషి, రైతాంగ సంక్షేమం కోసం చేపడుతున్న కార్యక్రమాలు ఆదర్శనీయమని నాయకులు కొనియాడారు. ఆత్మ కమిటీ డైరెక్టర్‌గా సందుల రవి నియామకం గ్రామీణ వ్యవసాయాభివృద్ధికి మరింత దోహదపడుతుందని ఆశాభావం వ్యక్తం చేశారు.ఈ కార్యక్రమంలో కాంగ్రెస్ పార్టీ మండల ఉపాధ్యక్షులు గోండ్ల శ్రీనివాస్, ఆత్మ కమిటీ డైరెక్టర్ సందుల రవి, నాయకులు కాదేపురం గంగన్న, గాజుల పండరి, ఇందూర్ గజేందర్, హొక్నారి అశోక్, మొండ్కారి కామప్ప, వడ్ల నాగయ్య తదితరులు పాల్గొన్నారు. కార్యక్రమం ఆత్మీయ వాతావరణంలో సాగగా, నాయకులు పరస్పరం శుభాకాంక్షలు తెలియజేసుకున్నారు.

కోటగిరి, జూన్ 03(డిడి9 వార్త) :
తెలంగాణ రాష్ట్రంలోని దళిత, గిరిజన జర్నలిస్టుల రక్షణతో పాటు వారి అభివృద్ధి, సంక్షేమమే తమ ప్రధాన లక్ష్యమని తెలంగాణ ఎస్సీ, ఎస్టీ వర్కింగ్ జర్నలిస్ట్ అసోసియేషన్ (టీఎస్ఎస్‌డబ్ల్యూజేఏ) రాష్ట్ర అధ్యక్షులు కాదేపురం గంగన్న పేర్కొన్నారు.బుధవారం కోటగిరి మండల కేంద్రంలోని మండల ప్రజా పరిషత్ కార్యాలయంలో ఉమ్మడి కోటగిరి మండలానికి చెందిన దళిత జర్నలిస్టులతో సమావేశం నిర్వహించారు. ఈ సందర్భంగా ఆయన మాట్లాడుతూ ప్రజలకు, ప్రభుత్వానికి మధ్య వారధులుగా పనిచేసే జర్నలిస్టులకు న్యాయం జరగాలని కోరారు.రాష్ట్ర ప్రభుత్వం చిన్న, పెద్ద పత్రికల మధ్య వివక్ష చూపకుండా ప్రతి జర్నలిస్టుకు అక్రిడిటేషన్ కార్డు మంజూరు చేయాలని, హెల్త్ కార్డులు అందించడంతో పాటు జర్నలిస్టుల పిల్లలకు విద్యలో పూర్తి రాయితీ కల్పించాలని డిమాండ్ చేశారు. ప్రతి జర్నలిస్టుకు ఇండ్ల స్థలం కేటాయించి, ఇందిరమ్మ ఇళ్ల పథకంలో ఇళ్లు మంజూరు చేయాలని కోరారు.
దళిత, గిరిజన జర్నలిస్టులపై దాడులు, వేధింపులు జరగకుండా ప్రత్యేక రక్షణ చట్టాన్ని ప్రభుత్వం వెంటనే అమలు చేయాలని ఆయన విజ్ఞప్తి చేశారు. త్వరలోనే నిజామాబాద్ జిల్లాలోని దళిత, గిరిజన జర్నలిస్టులను ఏకం చేసి జిల్లా ప్రథమ మహాసభ నిర్వహించనున్నట్లు తెలిపారు.ఈ సమావేశంలో బేగరి రాములు, రాము, భీంరావు, రాజేష్ తదితరులు పాల్గొన్నారు.

బీర్కూర్, మే 01(డిడి9 వార్త):

కాంగ్రెస్ పార్టీ ప్రభుత్వం ఇందిరమ్మ ఇండ్ల నిర్మాణం పేరుతో రాష్ట్రంలోని నిరుపేదలకు నీడను అందిస్తోందని ఇందిరమ్మ కమిటీ సభ్యులు, కాంగ్రెస్ పార్టీ మండల ఉపాధ్యక్షులు గోండ్ల శ్రీనివాస్ అన్నారు. మండలంలోని బరంగ్ ఏడ్గి గ్రామంలో ప్రభుత్వం ద్వారా మంజూరైన మూడు ఇందిరమ్మ ఇండ్లకు సోమవారం ప్రారంభించారు. ఈ సందర్బంగా ఇందిరమ్మ ఇండ్లను నిర్మించుకున్న లబ్ధిదారులైన దంపతులకు శాలువా కప్పి ఘనంగా సన్మానించారు. అదేవిదంగా తెలంగాణ రాష్ట్ర ముఖ్యమంత్రి అనుముల రేవంత్ రెడ్డి గారు, రాష్ట్ర వ్యవసాయ సలహాదారులు, బాన్సువాడ శాసనసభ్యులు పోచారం శ్రీనివాస్ రెడ్డి గారు, ఆగ్రో ఇండస్ట్రీస్ చైర్మన్ కాసుల బాలరాజ్ గారి ఫొటోలతో కూడిన చిత్రపటాన్ని బహుకరించారు. అనంతరం అయన మాట్లాడుతూ తెలంగాణ రాష్ట్ర ప్రభుత్వం ఇందిరమ్మ ఇండ్ల నిర్మాణాన్ని ప్రతిష్టాత్మకంగా తీసుకొని ఇండ్లు లేని నిరుపేదలకు ఇందిరమ్మ ఇండ్లను మంజూరు చేసిందని, దానికి బాన్సువాడ ఎమ్మెల్యే పోచారం శ్రీనివాస్ రెడ్డి గారు నియోజకవర్గంలోని అర్హులైన నిరుపేదలందరికీ ఇందిరమ్మ ఇండ్లను మంజూరు చేయడం జరిగిందని, ఇంకా రెండవ విడతలో మిగిలిఉన్న అర్హులకు ఇందిరమ్మ ఇండ్లను మంజూరు చేయడం జరుగుతుందన్నారు. అదేవిదంగా రాష్ట్ర ఆగ్రో ఇండస్ట్రీస్ చైర్మన్ కాసుల బాలరాజ్ ఇందిరమ్మ ఇండ్ల లబ్ధిదారులకు సహకారం అందిస్తున్న పోచారం గారికి మద్దతుగా నిలుస్తున్నారని అన్నారు. ఈ కార్యక్రమంలో ఇందిరమ్మ కమిటీ సభ్యులు బోయి లాలయ్య, ఏఎంసీ డైరెక్టర్ గోండ్ల రాజు, ఆత్మ కమిటీ సభ్యులు సందుల రవి, మాజీ సర్పంచ్ ఇందూర్ లక్ష్మన్, కాంగ్రెస్ పార్టీ నాయకులు కాదేపురం గంగన్న, కుమ్మరి గంగారాం, గాజుల పండరి, హొక్నారి అశోక్, ఇందూర్ గజేందర్, మేత్రి నాగుగొండ, చైనాపురం కామప్ప, జంగం బసలింగప్ప, మేత్రి బుజ్జిగొండ, హావగిర్ రావు, పుల్కాంటి హన్ముగొండ, చైనాపురం వీరప్ప, మేత్రి చాందు, నీరడి రాములు, బోయి సాయిలు, చాకలి నాగయ్య, గైని సాయిలు, గాజుల గజేందర్, గైని రాములు తదితరులు పాల్గొన్నారు.

బీర్కూర్, మే 31(డిడి9 వార్త): మండలంలోని బరంగ్ ఏడ్గి గ్రామానికి చెందిన కాంగ్రెస్ పార్టీ నాయకులు, అగ్రికల్చర్ టెక్నాలజీ మేనేజ్మెంట్ ఏజెన్సీ (ఆత్మ) కమిటీ డైరెక్టర్ సందుల రవికి శనివారం గ్రామ కాంగ్రెస్ నాయకులు ఘన సన్మానం నిర్వహించారు. నిగర్వి స్వభావంతో, చిరునవ్వుతో అందరినీ ఆప్యాయంగా పలకరించే సందుల రవికి ఇటీవల ఆత్మ కమిటీ డైరెక్టర్‌గా బాధ్యతలు దక్కిన సందర్భంగా ఈ సన్మానం చేపట్టారు.ఈ సందర్భంగా సందుల రవి మాట్లాడుతూ తనపై నమ్మకం ఉంచి ఆత్మ కమిటీ డైరెక్టర్‌గా నియమించిన తెలంగాణ రాష్ట్ర వ్యవసాయ సలహాదారులు, బాన్సువాడ ఎమ్మెల్యే పోచారం శ్రీనివాస్ రెడ్డి, రాష్ట్ర ఆగ్రో ఇండస్ట్రీస్ చైర్మన్ కాసుల బాలరాజ్, ఉమ్మడి నిజామాబాద్ జిల్లా డీసీసీబీ మాజీ చైర్మన్ పోచారం భాస్కర్ రెడ్డి, బాన్సువాడ మున్సిపల్ కో-ఆప్షన్ సభ్యులు కాసుల రోహిత్లకు కృతజ్ఞతలు తెలిపారు. బరంగ్ ఏడ్గి గ్రామ రైతుల సమస్యల పరిష్కారం కోసం నిరంతరం కృషి చేస్తానని ఆయన పేర్కొన్నారు.ఈ కార్యక్రమంలో కాంగ్రెస్ పార్టీ మండల ఉపాధ్యక్షులు గోండ్ల శ్రీనివాస్, కాంగ్రెస్ నాయకులు కాదేపురం గంగన్న, హొక్నారి అశోక్, ఇందూర్ గజేందర్, బోయి లాలయ్య, కుమ్మరి గంగారాం, గాజుల పండరి, మేత్రి నాగుగొండ, ఫుల్కంటి హన్ముగొండ, నీరడి రాములు, జంగం బసలింగప్ప, హట్కారి దశరథ్, బోయి సాయిలు, గూడెం సాయిబాబా తదితరులు పాల్గొన్నారు.

బీర్కూర్, మే 28(డిడి9 వార్త):

బీర్కూర్ మండలానికి చెందిన కుతాడి శంకర్ ఆత్మకమిటీ సభ్యుడిగా నూతనంగా ఎన్నుకోబడిన సందర్భంగా బీర్కూర్ యువనాయకుడు మియాపురం శశికాంత్ ఆధ్వర్యంలో ఘనంగా సన్మాన కార్యక్రమం నిర్వహించారు. ఈ సందర్భంగా శాలువాతో సత్కరించి అభినందనలు తెలియజేశారు.ఈ సందర్భంగా మియాపురం శశికాంత్ మాట్లాడుతూ, కుతాడి శంకర్‌కు వచ్చిన ఈ బాధ్యత ప్రజలకు సేవ చేసే దిశగా మరింత ఉపయోగపడాలని ఆకాంక్షించారు. సమాజ సేవలో ముందుండి ప్రజల సమస్యల పరిష్కారానికి కృషి చేయాలని సూచించారు.కుతాడి శంకర్ మాట్లాడుతూ తనపై నమ్మకం ఉంచి బాధ్యతలు అప్పగించిన అందరికీ కృతజ్ఞతలు తెలిపారు. ప్రజల ఆశయాలకు అనుగుణంగా పనిచేస్తూ అందరికీ అందుబాటులో ఉంటానని హామీ ఇచ్చారు.ఈ కార్యక్రమంలో మార్కెట్ కమిటీ వైస్ చైర్మన్ యమ రాములు, ఉప సర్పంచ్ పరమేశ్ పంతులు, మాజీ ఎంపీపీ రఘు, మేకల విట్టల్,వార్డుమెంబర్ కొరిమె రఘు, ప్రశాంత్యు, అశోక్, సాత్యకిరణ్, పృద్వి,అభిమానులు పాల్గొని శుభాకాంక్షలు తెలిపారు.

శాంతిభద్రతలను కాపాడే విధుల్లో నిత్యం నిమగ్నమయ్యే ఒక పోలీస్ కానిస్టేబుల్.. నేడు తన 11 నెలల కుమారుడి ప్రాణాలను కాపాడుకోవడానికి దాతల సాయం కోసం ఆర్తిగా ఎదురుచూస్తున్నారు. తీవ్రమైన బ్లడ్ ఇన్‌ఫెక్షన్ కారణంగా కాలేయం, కిడ్నీలు, మెదడు దెబ్బతిని హైదరాబాద్ లోని కొండాపూర్ కిమ్స్ ఆసుపత్రి ఐసీయూలో వెంటిలేటర్‌పై మృత్యువుతో పోరాడుతున్న తన చిన్నారి గంటా జష్విక్‌ను రక్షించుకోవడానికి ఆ తండ్రి పడుతున్న వేదన వర్ణనాతీతం.

కానిస్టేబుల్ గంటా నరేష్ కుమారుడు జష్విక్ క్లిష్టమైన ఆరోగ్య పరిస్థితిని ఎదుర్కొంటున్నాడు. అత్యవసర చికిత్స నిమిత్తం వైద్యులు రూ.20 లక్షలు ఖర్చవుతుందని తేల్చి చెప్పారు. దురదృష్టవశాత్తూ ఈ చికిత్సకు భద్రత ఇన్సూరెన్స్ కవరేజ్ రాదని చెప్పడంతో ఆ కుటుంబం ఒక్కసారిగా కుప్పకూలిపోయింది. ఉన్నపళంగా అంత సొమ్ము సర్దడం సాధ్యం కాక, ఇప్పటివరకు దాచుకున్నదంతా హారతి కర్పూరంలా కరిగిపోవడంతో తక్షణ ఆర్థిక సాయం కోసం ఆ తండ్రి యావత్ సమాజాన్ని వేడుకుంటున్నారు. ఉదార హృదయులైన దాతలు స్పందించి ఆర్థికంగా అండగా నిలవాలని, తమ చిన్నారిని ప్రార్థనలతో, విరాళాలతో ఆదుకోవాలని కోరుతున్నారు. చిన్నారి జష్విక్ చికిత్స నిమిత్తం నేరుగా తండ్రి ఖాతాకే విరాళాలు పంపవచ్చు. ఫోన్ పే, గూగుల్ పే నెంబర్ 8008689977, 9505853446, ఎస్బిఐ బ్యాంక్ అకౌంట్ నెంబర్ 39073968252 ఐఎసిఎఫ్సి కోడె నెంబర్ : SBIN0020376.

ట్రాన్స్‌ఫార్మర్ల దొంగతనాలకు పాల్పడుతున్న ఐదుగురు సభ్యుల ముఠాతో పాటు, దొంగిలించిన సొత్తును కొనుగోలు చేస్తున్న ఇద్దరు స్క్రాప్ వ్యాపారులను నిజామాబాద్​ జిల్లా రెంజల్ పోలీసులు అరెస్ట్ చేశారు. పరారీలో ఉన్న మరో ఇద్దరు స్క్రాప్ వ్యాపారుల కోసం గాలిస్తున్నారు. నిందితుల నుంచి 80 కేజీల రాగి కాయిల్స్, 3 మోటార్ సైకిళ్లు, 4 మొబైల్ ఫోన్లను స్వాధీనం చేసుకున్నారు.

​పోలీసుల కథనం ప్రకారం.. గురువారం సాయంత్రం రెంజల్ ఎస్ఐ తన సిబ్బందితో కలిసి సాటాపూర్ బైపాస్ వద్ద వాహన తనిఖీలు చేపట్టారు. ఆ సమయంలో మూడు మోటార్ సైకిళ్లపై అనుమానాస్పదంగా వస్తున్న ఐదుగురు వ్యక్తులు పోలీసులను చూసి పారిపోయేందుకు ప్రయత్నించారు. అప్రమత్తమైన పోలీసులు వారిని పట్టుకుని తనిఖీ చేయగా, ఒక గన్నీ బ్యాగులో ట్రాన్స్‌ఫార్మర్ రాగి కాయిల్స్ లభ్యమయ్యాయి. పట్టుబడిన వారిని మెదక్ పట్టణానికి చెందిన వనం సాయిలు, జగన్నాధం సారయ్య అలియాస్ శ్రీనివాస్, ధన శ్రీ కిరణ్, బోధన్‌కు చెందిన వనం పోశెట్టి, నారాయణఖేడ్‌కు చెందిన దాసరి పోచయ్యగా గుర్తించారు.

​వీరిని నిఘా నేత్రంతో విచారించగా విస్తుపోయే నిజాలు వెలుగుచూశాయి. గత రెండేళ్లుగా ఈ ఐదుగురు ఒక ముఠాగా ఏర్పడి వివిధ జిల్లాల్లో ఏకంగా 64 ట్రాన్స్‌ఫార్మర్లను పాడుచేసి వాటిలోని రాగి కాయిల్స్ దొంగిలించినట్లు ఒప్పుకున్నారు. నిజామాబాద్ జిల్లాలోని రెంజల్, బోధన్ రూరల్, బోధన్ టౌన్, వర్ని, కోటగిరి, నిజామాబాద్ రూరల్, మోపాల్, డిచ్‌పల్లి, జక్రాన్‌పల్లి, ఇందల్వాయి ప్రాంతాల్లో 38 దొంగతనాలకు పాల్పడ్డారు. అలాగే కామారెడ్డి జిల్లా పరిధిలోని కామారెడ్డి, బాన్సువాడ, పిట్లం, మద్నూర్, భిక్నూర్, ఎల్లారెడ్డి, నాగిరెడ్డిపేట్, పెద్ద కొడప్‌గల్ ప్రాంతాల్లో 20 ట్రాన్స్‌ఫార్మర్లను, మెదక్ జిల్లాలోని మెదక్ రూరల్, చేగుంట, వెల్దుర్తి ఏరియాలలో 4 దొంగతనాలను, సిద్దిపేట జిల్లా అక్కన్నపేట పరిధిలో 2 దొంగతనాలను చేసినట్లు నిర్ధారించారు. దొంగిలించిన రాగి సొత్తును బోధన్‌కు చెందిన సయ్యద్ అక్బర్ హుస్సేన్, నిజామాబాద్‌కు చెందిన షేక్ మహబూబ్‌లతో పాటు మేడ్చల్ జిల్లాకు చెందిన మాలప్ప మాస్టర్ అలియాస్ గౌతమ్, తాయప్ప దంగల్ అనే స్క్రాప్ వ్యాపారులకు విక్రయిస్తున్నట్లు తేలింది. వీరిలో స్క్రాప్ కొనుగోలు చేసిన సయ్యద్ అక్బర్ హుస్సేన్, షేక్ మహబూబ్‌లను పోలీసులు అరెస్ట్ చేయగా, మేడ్చల్ జిల్లాకు చెందిన మాలప్ప, తాయప్ప ప్రస్తుతం పరారీలో ఉన్నారు.

​ఎంతో చాకచక్యంగా వ్యవహరించి ఈ భారీ అంతరజిల్లా దొంగతనాల ముఠా గుట్టురట్టు చేసిన బోధన్ ఏసీపీ పి. శ్రీనివాస్, నిజామాబాద్ ట్రాఫిక్ ఏసీపీ మస్తాన్ అలీ, సీసీఎస్ ఇన్‌స్పెక్టర్ సాయినాథ్, రెంజల్ ఎస్ఐ చంద్ర మోహన్, బోధన్ రూరల్ ఎస్ఐ మచ్చేందర్ రెడ్డి, సీసీఎస్ ఎస్ఐ విట్టల్, హెడ్ కానిస్టేబుల్ వెంకట్రామ్, కానిస్టేబుళ్లు రవి, విశాల్, కృష్ణలను నిజామాబాద్ పోలీస్ కమిషనర్ శ్రీ పి. సాయి చైతన్య ఐపీఎస్ ప్రత్యేకంగా అభినందించి ప్రశంస పత్రాలను అందజేశారు.

బోధన్ పోలీస్ డివిజన్ పరిధిలో శాంతిభద్రతల పరిరక్షణ, పెండింగ్ కేసుల పురోగతిపై నిజామాబాద్ పోలీస్ కమిషనర్ శ్రీ పి. సాయి చైతన్య ఉన్నతాధికారులతో సమగ్ర సమీక్షా సమావేశం నిర్వహించారు. రాబోయే బక్రీద్ పండుగను పురస్కరించుకుని జిల్లా సరిహద్దుల్లో ఎక్కడా అలసత్వానికి తావులేకుండా 24 గంటల పాటు పటిష్టమైన తనిఖీలు చేపట్టాలని, ఇందుకోసం చెక్‌పోస్టుల వద్ద సిబ్బందిని అప్రమత్తం చేయాలని ఆదేశించారు. బోధన్ సబ్ డివిజన్ మహారాష్ట్ర సరిహద్దులకు ఆనుకుని ఉన్నందున, అంతరాష్ట్ర సరిహద్దుల గుండా రాకపోకలు సాగించే అనుమానాస్పద వ్యక్తులపై నిరంతర నిఘా ఉంచాలన్నారు. పొరుగు రాష్ట్ర పోలీసులతో మెరుగైన సమన్వయం సాధించడం ద్వారా నేరస్థుల కదలికలకు అడ్డుకట్ట వేయవచ్చని స్పష్టం చేశారు.

​ముఖ్యంగా హత్యలు, చోరీలు, సైబర్ మోసాలు, మహిళలపై జరిగే నేరాలతో పాటు డ్రగ్స్, గంజాయి, గుట్కా వంటి అక్రమ రవాణాపై రాజీలేని పోరాటం చేయాలని సిబ్బందికి పిలుపునిచ్చారు. చట్టవ్యతిరేక కార్యకలాపాలకు పాల్పడే పాత నేరస్థులు, రౌడీషీటర్లపై నిఘా పటిష్టం చేయడంతో పాటు అవసరమైతే పీడీ యాక్ట్ నమోదు చేయడానికి కూడా వెనుకాడబోమని హెచ్చరించారు. బాధితులకు త్వరితగతిన న్యాయం జరిగేలా పెండింగ్ కేసుల దర్యాప్తును వేగవంతం చేయాలన్నారు. మహిళల భద్రతకు అత్యంత ప్రాధాన్యత ఇస్తూ షీ టీమ్స్, ఈగల్ టీమ్స్, చీతా ఫోర్స్ బృందాలు విద్యాసంస్థలు, బస్టాండ్లు, రైల్వే స్టేషన్ల వంటి జనసంచారం ఉన్న ప్రాంతాల్లో నిరంతరం పర్యవేక్షించాలని సూచించారు. ఇదే సమయంలో సోషల్ మీడియాలో రెచ్చగొట్టే పోస్టులు పెట్టే వారిపై, అసత్య ప్రచారాలు చేసే వారిపై కఠిన చర్యలు తీసుకోవాలని ఆదేశించారు.

​రోడ్డు ప్రమాదాల నివారణపై కమిషనర్ ప్రత్యేకంగా దృష్టి సారించారు. ప్రమాదాలు ఎక్కువగా జరిగే బ్లాక్ స్పాట్లను గుర్తించి అక్కడ సైన్ బోర్డులు ఏర్పాటు చేయాలని, జాతీయ, రాష్ట్ర రహదారులను కలిపే లింక్ రోడ్ల వద్ద స్పీడ్ బ్రేకర్లు నిర్మించడంతో పాటు, రోడ్డుకు అడ్డుగా ఉన్న పొదలను తొలగించాలని సూచించారు. రోడ్డు ఇంజనీరింగ్ లోపాలను సరిదిద్దేందుకు సంబంధిత హైవే అధికారులతో సమన్వయం చేసుకోవాలన్నారు. వాహన చోదకుల్లో మార్పు తెచ్చేందుకు ప్రతిరోజూ డ్రంక్ అండ్ డ్రైవ్ పరీక్షలు నిర్వహించడంతో పాటు ఓవర్ స్పీడ్, ట్రిపుల్ రైడింగ్, మైనర్లు వాహనాలు నడపడం వంటి ఉల్లంఘనలపై ప్రత్యేక తనిఖీలు చేపట్టాలని ఆదేశించారు. పోలీస్ స్టేషన్లలో బాధితులకు స్నేహపూర్వక వాతావరణం కల్పించి, ఫిర్యాదుదారులతో మర్యాదగా వ్యవహరించాలని, శాంతిభద్రతల పరిరక్షణలో ఎలాంటి నిర్లక్ష్యాన్ని సహించేది లేదని కమిషనర్ స్పష్టం చేశారు. ఈ సమావేశంలో బోధన్ ఏసీపీ శ్రీనివాస్, సీటీసీ ఏసీపీ రాజశేఖర్, ప్రత్యేక విభాగాల ఇన్‌స్పెక్టర్లు, సీఐలు, ఎస్సైలు పాల్గొన్నారు.

ఎలాంటి ఆంక్షలు లేకుండా అర్హులైన బీడీ కార్మికులందరికీ 'చేయూత' పథకం కింద నెలకు రూ.4,000 పింఛను వెంటనే మంజూరు చేయాలని ప్రగతిశీల బీడీ వర్కర్స్ యూనియన్ డిమాండ్ చేసింది. రుద్రూర్ మండల కేంద్రంలో యూనియన్ బోధన్ ఏరియా కమిటీ ఆధ్వర్యంలో శుక్రవారం బీడీ కార్మికులు భారీ ర్యాలీ నిర్వహించారు. స్థానిక అంగడి బజారు నుంచి సమీకృత మండల కార్యాలయం వరకు ప్రదర్శనగా వెళ్లి, అక్కడ ధర్నా చేపట్టారు. ఈ సందర్భంగా యూనియన్ జిల్లా ఉపాధ్యక్షుడు బి. మల్లేష్ మాట్లాడుతూ.. గత సార్వత్రిక ఎన్నికల సమయంలో ముఖ్యమంత్రి రేవంత్ రెడ్డి ఇచ్చిన హామీ మేరకు బీడీ కార్మికులకు తక్షణమే నాలుగు వేల రూపాయల పింఛన్ అందించాలన్నారు. వచ్చే జూన్ 2న రాష్ట్ర అవతరణ దినోత్సవం సందర్భంగా కొత్త పెన్షన్లు ఇస్తామని మంత్రులు ప్రకటనలు చేస్తున్నారని, ఈ ప్రక్రియలో కట్ ఆఫ్ డేట్ నిబంధనను పూర్తిగా తొలగించి కార్మికులందరికీ న్యాయం చేయాలని కోరారు.

​ప్రభుత్వం స్పందించని పక్షంలో బీడీ కార్మికులందరినీ ఏకం చేసి పెద్ద ఎత్తున ఆందోళనలు ఉధృతం చేస్తామని ఆయన హెచ్చరించారు. అనంతరం తమ డిమాండ్లతో కూడిన వినతి పత్రాన్ని ఇన్చార్జి అధికారికి అందజేశారు. అయితే, అధికారులు కార్మికుల వ్యక్తిగత దరఖాస్తు ఫారాలను స్వీకరించేందుకు నిరాకరించడంతో ఆగ్రహించిన కార్మికులు సమీకృత మండల భవన సముదాయంలోనే బైఠాయించి నిరసన తెలిపారు. ఈ ఆందోళన కార్యక్రమంలో యూనియన్ బోధన్ ఏరియా కమిటీ నాయకులు శోభ, బుజ్జి, లతా, శంకరమ్మ, లక్ష్మీ, గంగామణితో పాటు పెద్ద సంఖ్యలో బీడీ కార్మికులు పాల్గొన్నారు.