బాన్సువాడ, ఆగస్టు 29(డిడి9 వార్త):

ఇద్దరు చిన్నారులకు పక్కా ఇల్లు కట్టాలన్న ఓ కూలీ యువకుడి కల విషాదాంతమైంది.ఇంటి నిర్మాణం కోసం తీసుకున్న రుణాలు చెల్లించలేకపోవడంతో ఫైనాన్స్‌ సంస్థ ఇంటిని జప్తు చేసింది.దీంతో తీవ్ర మనస్తాపానికి గురైన నసురుల్లాబాద్ మండలం బస్వాయిపల్లికి చెందిన పిట్టల విఠల్‌ (28) మృతిచెందాడు.భార్య, ఐదేళ్లు, మూడేళ్ల ఇద్దరు చిన్నారులతో జీవిస్తున్న విఠల్‌.. ఇంటి జప్తు తర్వాత తల్లి ఇంట్లో తలదాచుకున్నాడు.ఆగస్టు 28న ఇంటి నుంచి బయటకు వెళ్లిన ఆయన తిరిగి రాలేదు. కుటుంబ సభ్యులు వెతకగా సీజ్‌ చేసిన ఇంట్లోనే విగతజీవిగా కనిపించాడు.ఘటనపై నసురుల్లాబాద్ పోలీసులు కేసు నమోదు చేసి దర్యాప్తు చేస్తున్నారు. ఇద్దరు చిన్నారులు తండ్రిని కోల్పోవడంతో కుటుంబంలో విషాదం నెలకొంది.

బాన్సువాడ, ఆగస్టు 29(డిడి9 వార్త):

కామారెడ్డి జిల్లా బీర్కూర్ శివారులోని తెలంగాణ తిరుమల దేవస్థానంలో శనివారం లోక కళ్యాణార్థం వరుణ యాగం, సుదర్శన యాగం ఘనంగా నిర్వహించారు.ఆలయ ధర్మకర్త, బాన్సువాడ ఎమ్మెల్యే పోచారం శ్రీనివాస్ రెడ్డి ఆధ్వర్యంలో వేద పండితులు ప్రత్యేక పూజలు, యాగ కార్యక్రమాలను నిర్వహించారు.ప్రజల సుఖశాంతులు, సకాలంలో వర్షాలు కురిసి పాడిపంటలు సమృద్ధిగా పండాలని, రాష్ట్రం సుభిక్షంగా ఉండాలని ఆకాంక్షిస్తూ యాగాలను నిర్వహించినట్లు తెలిపారు.ఈ సందర్భంగా ఆలయంలో ప్రత్యేక పూజలు నిర్వహించి స్వామివారిని దర్శించుకున్నారు.కార్యక్రమంలో ఆలయ కమిటీ సభ్యులు శంభు రెడ్డి, అర్చకులు, భక్తులు తదితరులు పాల్గొన్నారు.

బాన్సువాడ, ఆగస్టు 29 (డిడి9 వార్త):

అనారోగ్యంతో బాధపడుతూ హైదరాబాద్‌లోని నిమ్స్ ఆసుపత్రిలో చికిత్స పొందుతున్న కామారెడ్డి జిల్లా బీర్కూర్ గ్రామానికి చెందిన షేక్ ఫాతిమాబీ భర్త బాబుకు ఆపరేషన్ నిమిత్తం రాష్ట్ర ప్రభుత్వ వ్యవసాయ సలహాదారులు, బాన్సువాడ ఎమ్మెల్యే పోచారం శ్రీనివాస్ రెడ్డి రూ.2.50 లక్షల విలువైన ఎల్‌ఓసీ మంజూరు చేయించారు.ఆరోగ్య పరిస్థితి దృష్ట్యా ఆపరేషన్‌కు ఆర్థిక సహాయం అవసరమని తెలుసుకున్న పోచారం శ్రీనివాస్ రెడ్డి స్పందించి, ఎల్‌ఓసీ అందేలా చర్యలు తీసుకున్నారు.దీంతో బాధిత కుటుంబ సభ్యులు పోచారం శ్రీనివాస్ రెడ్డికి కృతజ్ఞతలు తెలిపారు.పేద ప్రజలకు అండగా నిలుస్తూ, కులమతాలకు అతీతంగా సేవా కార్యక్రమాలు చేపడుతున్న పోచారం కుటుంబం తమకు ఆపదలో అండగా నిలిచిందని గ్రామస్థులు పేర్కొన్నారు.ప్రజలకు ఎలాంటి కష్టం వచ్చినా తమ కుటుంబం అండగా ఉంటుందని పోచారం శ్రీనివాస్ రెడ్డి భరోసా కల్పిస్తున్నారని అభిమానులు తెలిపారు.ఈ సందర్భంగా పోచారం శ్రీనివాస్ రెడ్డి, పోచారం భాస్కర్ రెడ్డి కుటుంబ సభ్యులకు గ్రామస్థులు అభినందనలు తెలిపారు.

బాన్సువాడ, ఆగస్టు 29(డిడి9 వార్త): తమ భూమిలో అక్రమంగా నిర్మాణాలు చేపడుతున్నారని ఆరోపిస్తూ బాధిత కుటుంబ సభ్యులు శనివారం బీర్కూర్ గ్రామపంచాయతీ కార్యాలయం ఎదుట ధర్నా నిర్వహించారు.అక్రమ నిర్మాణాలను వెంటనే నిలిపివేసి తమకు న్యాయం చేయాలని డిమాండ్ చేశారు.బాధితుల వివరాల ప్రకారం.. బీర్కూర్ మండల కేంద్రంలోని సర్వే నంబర్ 611లో మొత్తం 69 గుంటల భూమి ఉందన్నారు.1978లో అదే గ్రామానికి చెందిన కొత్తిడ్గి నాగయ్యకు 35 గుంటల భూమిని విక్రయించినట్లు తెలిపారు.అనంతరం నాగయ్య ఆ భూమిని మేకల సత్యవతికి విక్రయించినట్లు పేర్కొన్నారు.అయితే మిగిలిన 34 గుంటల భూమిలో తమకు ఎలాంటి సమాచారం ఇవ్వకుండా మేకల సత్యవతి నిర్మాణాలు చేపడుతున్నారని ఇర్పా శంకరప్ప కుటుంబ సభ్యులు ఆరోపించారు.ఈ విషయంపై ఇప్పటికే తహసీల్దార్, గ్రామపంచాయతీ అధికారులకు వినతిపత్రాలు అందజేసి నిర్మాణాలను నిలిపివేయాలని కోరినట్లు తెలిపారు.అయినప్పటికీ సమస్య పరిష్కారం కాకపోవడంతో గ్రామపంచాయతీ కార్యాలయం ఎదుట ధర్నాకు దిగాల్సి వచ్చిందని ఆవేదన వ్యక్తం చేశారు.భూమికి సంబంధించిన రికార్డులను పూర్తిస్థాయిలో పరిశీలించి, వివాదాస్పద స్థలంలో జరుగుతున్న నిర్మాణాలను తక్షణమే నిలిపివేసి తమకు న్యాయం చేయాలని రెవెన్యూ, పంచాయతీ శాఖ అధికారులను కోరారు.అధికారులు స్పందించి సమస్యను పరిష్కరించే వరకు ఆందోళన కొనసాగిస్తామని తెలిపారు.అవసరమైతే రాష్ట్ర ముఖ్యమంత్రి రేవంత్ రెడ్డి, రెవెన్యూ మంత్రి పొంగులేటిని కలిసి తమకు న్యాయం చేయాలని విజ్ఞప్తి చేస్తామని బాధితులు పేర్కొన్నారు.

టీవీఎస్ ఎక్స్‌ఎల్ వాహనంపై అక్రమంగా గంజాయిని రవాణా చేస్తున్న ఓ వ్యక్తిని నిజామాబాద్ జిల్లా బోధన్ రూరల్ పోలీసులు పట్టుకుని, అతని వద్ద నుంచి 4 కేజీల గంజాయిని స్వాధీనం చేసుకున్నారు. పోలీసుల కథనం ప్రకారం.. టీవీఎస్ ఎక్స్‌ఎల్ వాహనంపై ఓ వ్యక్తి బోధన్ పట్టణానికి గంజాయి సరఫరా చేసేందుకు వస్తున్నాడన్న నమ్మదగిన సమాచారం అందింది. దీంతో రూరల్ సీఐ విజయ్ బాబు ఆదేశాల మేరకు ఎస్‌ఐ రాజశేఖర్ తమ సిబ్బందితో కలిసి సాలూర చెక్‌పోస్ట్ వద్ద విస్తృత తనిఖీలు చేపట్టారు. ఈ క్రమంలో అనుమానాస్పదంగా వస్తున్న మహారాష్ట్రలోని ధర్మాబాద్ తాలూకాకు చెందిన లక్ష్మణ్ గంగగిరి (65) అనే వ్యక్తి అదుపులోకి తీసుకుని సోదా చేయగా 4 కేజీల గంజాయి లభించింది. గంజాయితో పాటు వాహనాన్ని స్వాధీనం చేసుకుని, నిందితుడిపై కేసు నమోదు చేసి దర్యాప్తు జరుపుతున్నట్లు ఎస్‌ఐ తెలిపారు.  

బీర్కూర్, ఆగస్టు 28(డిడి9 వార్త): రక్షాబంధన్ పర్వదినాన్ని పురస్కరించుకుని బీర్కూర్ పోలీస్ ఠాణాలో శుక్రవారం రాఖీ వేడుకలు ఘనంగా నిర్వహించారు. ఈ సందర్భంగా మహిళా కానిస్టేబుల్స్ పోలీస్ ఠాణాలో విధులు నిర్వహిస్తున్న ఎస్సై వి.కే. రాములు, ఏఎస్సై అమృ, కానిస్టేబుల్స్‌ సంతోష్,శివకుమార్ లకు రాఖీలు కట్టి రక్షాబంధన్ శుభాకాంక్షలు తెలిపారు.అన్నాచెల్లెళ్ల అనుబంధానికి ప్రతీకగా నిలిచే రక్షాబంధన్ సందర్భంగా పోలీసు సిబ్బంది పరస్పరం శుభాకాంక్షలు తెలియజేసుకున్నారు.విధి నిర్వహణలో పోలీసుల మధ్య సోదరభావం, ఆత్మీయతను పెంపొందించేలా ఈ కార్యక్రమం కొనసాగింది.మహిళా కానిస్టేబుల్స్ రాఖీలు కట్టడంతో పోలీస్ ఠాణాలో పండుగ వాతావరణం నెలకొంది.

ఆర్మూర్ పట్టణంలోని రామ్ భవన్‌లో రక్షాబంధన్ వేడుకలు అత్యంత వేడుకగా జరిగాయి. ప్రముఖ సామాజిక నాయకులు, లయన్స్ క్లబ్ ఆఫ్ ఆర్మూర్ గ్రీన్ చార్టర్ ప్రెసిడెంట్, జీజీ ఫౌండేషన్ చైర్మన్ లయన్ నివేదన్ గుజరాతీకీ వారి అక్కాచెల్లెళ్లు రాఖీలు కట్టి, మిఠాయిలు తినిపించి ఆశీర్వాదాలు అందించారు.

​ఈ సందర్భంగా లయన్ నివేదన్ గుజరాతీ మాట్లాడుతూ... రాఖీ పౌర్ణమి అనేది అన్నాచెల్లెళ్ల స్వచ్ఛమైన ప్రేమ, ఆప్యాయత, మరియు పరస్పర రక్షణకు ప్రతీకగా నిలిచే అత్యంత పవిత్రమైన పండుగ అని కొనియాడారు. అన్నాచెల్లెళ్ల బంధం ఎంతో మధురమైనదని పేర్కొంటూ, "మీరు మాకు రక్ష.. మేము మీకు రక్ష.. మనమందరం కలిసి ఈ దేశానికి రక్ష" అనే గొప్ప సందేశాన్ని చాటారు. ఈ పవిత్రమైన పర్వదినాన్ని పురస్కరించుకుని ఆర్మూర్ పట్టణ ప్రజలకు, పరిసర గ్రామాల ప్రజలకు ఆయన హృదయపూర్వక పండుగ శుభాకాంక్షలు తెలియజేశారు.

​ఈ కార్యక్రమంలో నివేదన్ గుజరాతీ కుటుంబ సభ్యులైన గుజరాతీ గీత, చవాన్ భావన, ఘటాడి నిర్మల, కొండల్వాడి మీరా బాయి, ప్రశాంతి, వినతి తదితరులు పాల్గొన్నారు..

బాన్సువాడ, ఆగస్టు 28(డిడి9 వార్త): కామారెడ్డి జిల్లా బీర్కూర్ మండల కేంద్రంలోని పోచారం కాలనీలో గత నెల రోజులుగా తాగునీటి సరఫరా నిలిచిపోవడంతో కాలనీవాసులు తీవ్ర ఇబ్బందులు ఎదుర్కొంటున్నారు.నీటి సమస్యను పరిష్కరించాలని పలుమార్లు సంబంధిత అధికారుల,పాలకవర్గం దృష్టికి తీసుకెళ్లినా సమస్య పరిష్కారం కాకపోవడంతో శుక్రవారం కాలనీవాసులు నిరసన వ్యక్తం చేస్తూ ధర్నా నిర్వహించారు.ఈ సందర్భంగా కాలనీవాసులు మాట్లాడుతూ..నెల రోజులుగా తాగునీరు రాకపోవడంతో తాగునీటి కోసం తీవ్ర ఇబ్బందులు పడుతున్నామని ఆవేదన వ్యక్తం చేశారు.దూర ప్రాంతాల నుంచి నీటిని తెచ్చుకోవాల్సి వస్తోందని, ముఖ్యంగా మహిళలు, వృద్ధులు తీవ్ర ఇబ్బందులు ఎదుర్కొంటున్నారని తెలిపారు.తాగునీటి సమస్యను వెంటనే పరిష్కరించి, క్రమం తప్పకుండా నీటి సరఫరా జరిగేలా అధికారులు,పాలకవర్గం చర్యలు తీసుకోవాలని వారు డిమాండ్ చేశారు.సమస్యను పరిష్కరించకపోతే ఆందోళనను మరింత ఉధృతం చేస్తామని కాలనీవాసులు హెచ్చరించారు.ఈ కార్యక్రమంలో కాలనీవాసులు ఉన్నారు.

రాష్ట్రంలో పెండింగ్‌లో ఉన్న విద్యార్థుల స్కాలర్‌షిప్‌లు, ఫీజు రీయింబర్స్‌మెంట్ బకాయిలను వెంటనే విడుదల చేయాలని డిమాండ్ చేస్తూ బీజేవైఎం ఆధ్వర్యంలో  ఆర్మూర్ పట్టణ కేంద్రంలో నిరసన కార్యక్రమం నిర్వహించారు. బీజేవైఎం రాష్ట్ర శాఖ పిలుపుమేరకు చేపట్టిన ఈ కార్యక్రమంలో ముఖ్యమంత్రి రేవంత్ రెడ్డి దిష్టిబొమ్మను దహనం చేశారు.

​ఈ సందర్భంగా బీజేవైఎం జిల్లా అధ్యక్షుడు వంశీ గౌడ్ మాట్లాడుతూ... రాష్ట్రంలో సుమారు రూ.14,000 కోట్ల ఫీజు బకాయిలు పెండింగ్‌లో ఉండటంతో బడుగు, బలహీన వర్గాల విద్యార్థుల చదువులు మధ్యలోనే ఆగిపోయే పరిస్థితి దాపురించిందన్నారు. విద్యార్థుల హక్కుల సాధన కోసం 'ఫీజుల బకాయిలు – బీజేపీ లడాయి' పేరుతో ఆందోళనలు కొనసాగిస్తున్నామని, ఇందులో భాగంగా పార్టీ రాష్ట్ర అధ్యక్షుడు రామచందర్ రావు రెండు రోజుల పాటు నిరాహార దీక్ష చేపట్టినా ప్రభుత్వం పట్టించుకోకపోవడం దారుణమని ధ్వజమెత్తారు. ప్రభుత్వం తక్షణమే స్పందించి బకాయిలు విడుదల చేయకపోతే ఉద్యమాన్ని మరింత ఉధృతం చేస్తామని హెచ్చరించారు. ఈ కార్యక్రమంలో బీజేపీ పట్టణ అధ్యక్షుడు మందుల బాలు, నాయకులు ఉదయ్ గౌడ్, శ్రావణ్ గౌడ్, పుల్కం వేణు తదితరులు పాల్గొన్నారు.

ప్రభుత్వ పాఠశాలల అభివృద్ధిలో స్వచ్ఛంద సంస్థల భాగస్వామ్యం ప్రశంసనీయమని ఎంఈఓ నరేష్ అన్నారు. డిచ్‌పల్లి మండలం దూస్గావ్ మండల పరిషత్ ప్రాథమిక పాఠశాలలో రోటరీ క్లబ్ ఆఫ్ నిజామాబాద్ ఆధ్వర్యంలో, కేర్ డిగ్రీ కళాశాల సహకారంతో బుధవారం విద్యార్థులకు బెంచీలను అందజేశారు. రాఖీ పండుగ సందర్భాన్ని పురస్కరించుకుని ఈ కార్యక్రమాన్ని నిర్వహించారు.

​ఇన్నాళ్లూ నేలపైనే కూర్చుని పాఠాలు వింటూ ఇబ్బందులు పడ్డ చిన్నారులకు కొత్త బెంచీలు రావడంతో వారి ముఖాల్లో ఆనందం వెల్లివిరిసింది. బెంచీలపై కూర్చుని మరింత ఉత్సాహంగా చదువుకుంటామని విద్యార్థులు తెలిపారు. ఈ సందర్భంగా ఎంఈఓ నరేష్ మాట్లాడుతూ.. రోటరీ క్లబ్ గత కొన్నేళ్లుగా విద్యారంగంలో మంచినీటి సౌకర్యం, పుస్తకాలు, బెంచీల పంపిణీ వంటి బహుముఖ సేవలు అందించడం అభినందనీయమన్నారు. సర్కారు బడుల్లోని విద్యార్థులకు సరైన ప్రోత్సాహం దక్కితే అద్భుతాలు సృష్టిస్తారని డీసీఈబీ సెక్రెటరీ సీతయ్య పేర్కొన్నారు.

​నిరుపేద విద్యార్థులకు అవసరమైన మౌలిక వసతులు కల్పించడమే తమ ప్రధాన లక్ష్యమని రోటరీ క్లబ్ అధ్యక్షుడు శ్రీకాంత్ ఝవార్ తెలిపారు. పాఠశాల ప్రధానోపాధ్యాయురాలు భూమావతి అధ్యక్షతన జరిగిన ఈ కార్యక్రమంలో సర్పంచ్ సువర్ణ వెంకట్, వీడీసీ చైర్మన్ సాయిలు, రోటరీ క్లబ్ ప్రతినిధులు బెజ్గం అశోక్, అంకిత్ అగర్వాల్, శ్యామ్ అగర్వాల్, కేర్ కళాశాల డైరెక్టర్ నరాల సుధాకర్, ఉపాధ్యాయులు, గ్రామస్తులు పాల్గొన్నారు.

 

సోదరభావానికి ప్రతీక అయిన రక్షాబంధన్ పర్వదినాన్ని పురస్కరించుకుని జిల్లా ప్రజలకు ప్రభుత్వ సలహాదారు పి. సుదర్శన్ రెడ్డి, కలెక్టర్ భవేష్ మిశ్రా రాఖీ శుభాకాంక్షలు తెలిపారు. ప్రజలందరూ ఈ పండుగను ఆనందోత్సాహాల నడుమ జరుపుకోవాలని ఆకాంక్షించారు. సోదరీమణులకు ఏ ఆపద రాకుండా ఎల్లవేళలా అండగా ఉంటామని సోదరులు భరోసానివ్వడమే ఈ పండుగ విశిష్టత అని పేర్కొన్నారు. రాఖీ పండుగ కుటుంబ బంధాలను బలోపేతం చేస్తుందని, మహిళలకు భద్రత, గౌరవం అందించాలనే సందేశాన్ని ఇస్తుందని తెలిపారు. కులమతాలకు అతీతంగా మానవత్వాన్ని, ప్రేమానురాగాలను చాటే ఈ పర్వదినం మన సంస్కృతీ సంప్రదాయాల గొప్పదనాన్ని ప్రపంచానికి చాటుతుందన్నారు. రాఖీ పౌర్ణమి వేడుకలు ప్రజల మధ్య ఆత్మీయతను మరింత పెంపొందించాలని వారు కోరారు.

అంతర్జాతీయ స్థాయిలో ప్రతిభ చాటి గ్రామానికి, దేశానికి మంచి పేరు తెచ్చిన కమ్మర్‌పల్లి మండలం హాస కొత్తూరుకు చెందిన యంగ్ అథ్లెట్ చీర్లంచ శస్వంత్‌ను శుక్రవారం గ్రామ పంచాయతీ పాలకవర్గం ఆధ్వర్యంలో ఘనంగా సన్మానించారు. గ్రామానికి చెందిన చీర్లంచ వేణు - జ్యోతి దంపతుల కుమారుడైన శస్వంత్, మలేషియాలో జరిగిన ఛాంపియన్‌షిప్ 2026'లో భారత్ తరఫున ప్రాతినిధ్యం వహించి సత్తా చాటాడు. ఈ సందర్భంగా సర్పంచ్ నలీమేళ గంగారెడ్డి మాట్లాడుతూ.. మన పల్లె నుంచి అంతర్జాతీయ స్థాయికి ఎదిగి దేశానికి, రాష్ట్రానికి కీర్తి ప్రతిష్టలు తెచ్చిన శస్వంత్‌ను అభినందించారు. భవిష్యత్తులోనూ మరిన్ని విజయాలు సాధించి ఉన్నత శిఖరాలకు చేరుకోవాలని ఆకాంక్షించారు. ఈ కార్యక్రమంలో ఉపసర్పంచ్ ఏనుగు మనోహర్, మాజీ ఎంపీటీసీ తెడ్డు రాజన్న, కాంగ్రెస్ పార్టీ గ్రామ శాఖ అధ్యక్షుడు ఎడ్ల శ్రీకాంత్, వార్డు సభ్యులు కల్లెడ రాణి, కల్లెడ కాశవ్వ, నాయకులు జంగం మహేష్, దేవయి రాజేశ్వర్, శ్రీనివాస్, ఉట్నూర్ నరేష్, గోపి తదితరులు పాల్గొన్నారు.

ఓటర్ల జాబితా ప్రత్యేక సమగ్ర సవరణ ప్రక్రియలో జారీ చేస్తున్నవిచారణ నోటీసుల విషయమై ఓటర్లు ఎలాంటి ఆందోళనకు గురికావద్దని నిజామాబాద్ నగర పాలక సంస్థ కమిషనర్, అర్బన్ నియోజకవర్గ ఓటరు నమోదు అధికారి దిలీప్ కుమార్ సూచించారు. 2002 ఓటరు జాబితాతో మ్యాపింగ్ కాని వారికి, పేరు, వయస్సు వంటి వివరాల్లో వ్యత్యాసాలున్న వారికి మాత్రమే నోటీసులు జారీ చేస్తున్నట్లు స్పష్టం చేశారు. బీఎల్‌ఓలు ఇళ్ల వద్దకే వచ్చి నోటీసులు అందిస్తున్నారని, నోటీసు అందుకున్న ఓటర్లు నిర్ణీత సమయానికి వేదిక వద్దకు హాజరై తగిన ధ్రువీకరణ పత్రాలు అందజేయాలని కోరారు. ముసాయిదా ఓటరు జాబితాపై అభ్యంతరాలను సెప్టెంబర్ 16 వరకు తెలియజేయవచ్చని, విచారణ నోటీసుల పరిష్కార ప్రక్రియ అక్టోబర్ 15 వరకు కొనసాగుతుందని తెలిపారు. ఆధారాలు సమర్పిస్తే అర్హులైన వారి పేర్లను ఓటరు జాబితాలో కొనసాగిస్తామని ఆయన వివరించారు.

కమ్మర్‌పల్లి మండలంలోని ఇనాయత్‌నగర్ గ్రామంలో ధాన్యం నిల్వ కోసం నూతనంగా ఏర్పాటు చేసిన గోదామును గురువారం సర్పంచ్ బాణావత్ లలితా రాములు, ఉపసర్పంచ్ మకిలి అనిల్ కుమార్ కలిసి ప్రారంభించారు. రైతులు పండించిన పంటను భద్రపరుచుకోవడానికి ఈ గోదాము ఎంతగానో ఉపయోగపడుతుందని ఈ సందర్భంగా వారు తెలిపారు. ఈ కార్యక్రమంలో గ్రామ కాంగ్రెస్ పార్టీ అధ్యక్షుడు కచ్చకాయల భూమేష్, వార్డు సభ్యుడు జక్కుల రాజన్న, విలేజ్ డెవలప్‌మెంట్ కమిటీ సభ్యులు ఏగుల రాజన్న, వడ్లూరి మోహన్, వెంకటి గంగాధర్, కంచ నర్సయ్య తదితరులు పాల్గొన్నారు.

ఓటర్ల జాబితా ప్రత్యేక సవరణ ప్రక్రియలో వివరాలు తప్పుగా నమోదైన వారికి మాత్రమే నోటీసులు జారీ చేస్తున్నట్లు కమ్మర్‌పల్లి తహసీల్దార్ నరేష్ తెలిపారు. గురువారం మండలంలోని అన్ని గ్రామాల్లో ఎస్‌ఐఆర్‌పై ప్రత్యేక గ్రామసభలు నిర్వహించారు. కోణాసమందర్ గ్రామంలో సర్పంచ్ బెజ్జాల అధ్యక్షతన జరిగిన సభకు తహసీల్దార్ నరేష్ హాజరయ్యారు. ముందుగా బీఎల్‌ఓలు నూతన ఓటర్ల జాబితాను చదివి వినిపించారు. అనంతరం లోపాలున్న ఓటర్లకు నోటీసులు అందజేశారు.

సాలూర మండల కేంద్రంలో ఎస్‌ఐఆర్-2026 ప్రత్యేక సవరణ ప్రక్రియపై గురువారం గ్రామసభను నిర్వహించారు. కేంద్ర ఎన్నికల సంఘం ఆదేశాల మేరకు చేపట్టిన ఓటర్ల జాబితా పరిశీలన కార్యక్రమంలో భాగంగా ఈ సమావేశాన్ని ఏర్పాటు చేసినట్లు రెవెన్యూ ఇన్స్‌పెక్టర్ మెహర్ ఆనంద్ తెలిపారు. ఈ సందర్భంగా ఆర్ఐ మాట్లాడుతూ.. ప్రజాస్వామ్యంలో ఓటు హక్కు ఎంతో విలువైనదని, అర్హులైన ప్రతి ఒక్కరూ ఓటరుగా నమోదు చేసుకోవాలని పిలుపునిచ్చారు. ఎస్‌ఐఆర్ ద్వారా కొత్త ఓటర్ల నమోదుతో పాటు జాబితాలోని తప్పుల దిద్దుబాటు, సవరణలకు అవకాశం కల్పిస్తున్నట్లు వివరించారు. గ్రామస్తులు తమ వివరాలను సరిచూసుకుని, అవసరమైన ధ్రువీకరణ పత్రాలను అధికారులకు అందజేయాలని కోరారు. అనంతరం బిఎల్‌ఓలు ఓటరు జాబితాలోని సవరణలు చదివి వినిపించారు. ఈ కార్యక్రమంలో సర్పంచ్ సోక్కం లావణ్య, రెవెన్యూ సిబ్బంది కళావతి, బూత్ స్థాయి అధికారులు భూమయ్య, సత్య గంగామణి, గోదావరి, మాధవి, సరోజ, శిల్ప, విజయ్ కుమార్, గ్రామ ప్రజలు పాల్గొన్నారు.

మద్యం సేవించి వాహనాలు నడిపే వారిపై చర్యల్లో భాగంగా సాలూర అంతర్రాష్ట్ర చెక్‌పోస్ట్ వద్ద బోధన్ రూరల్ పోలీసులు గురువారం విస్తృతంగా డ్రంక్ అండ్ డ్రైవ్ తనిఖీలు చేపట్టారు. బోధన్ రూరల్ పోలీసుల ఆధ్వర్యంలో నిర్వహించిన ఈ తనిఖీల్లో మద్యం తాగి వాహనాలు నడుపుతున్న పలువురిని బ్రీత్ ఎనలైజర్ల ద్వారా పరీక్షించి జరిమానాలు విధించారు. ఈ సందర్భంగా పోలీసులు మాట్లాడుతూ.. మద్యం మత్తులో వాహనాలు నడపడం వల్ల ప్రమాదాలు జరిగి ప్రాణాలు కోల్పోయే ప్రమాదం ఉందని హెచ్చరించారు. నిబంధనలు ఉల్లంఘిస్తే కఠిన చర్యలు తప్పవని స్పష్టం చేశారు. ప్రతి ఒక్కరు ట్రాఫిక్ నిబంధనలు తప్పకుండ పాటించాలని సూచించారు. ఈ తనిఖీల్లో పోలీస్ సిబ్బంది అంజాద్, గంగాధర్, శ్రావణ్, రమేష్ లు ఉన్నారు.

బోధన్ పట్టణంలోని తట్టికోట ప్రభుత్వ ఉన్నత పాఠశాలలో రక్షాబంధన్ వేడుకలను గురువారం అత్యంత వైభవంగా నిర్వహించారు. ఈ సందర్భంగా విద్యార్థినీ, విద్యార్థులు ఒకరికొకరు రాఖీ శుభాకాంక్షలు తెలుపుకున్నారు. సోదరభావానికి, ఆప్యాయతలకు ప్రతీకగా నిలిచే రక్షాబంధన్ పండుగ ప్రాముఖ్యతను ఉపాధ్యాయులు విద్యార్థులకు వివరించారు. ఈ వేడుకల్లో పాఠశాల ప్రధానోపాధ్యాయులు కిషోర్ కుమార్, ఉపాధ్యాయులు ఇందూర్ లలిత, చంద్రకళ, శిరీష, గాయత్రి, రాజులు పాల్గొన్నారు.

ఎడపల్లి మండలం జానకంపేట్ శ్రీ లక్ష్మీనరసింహ స్వామి ఆలయంలో గురువారం దేవాదాయ ధర్మాదాయ శాఖ ఆధ్వర్యంలో పలు సేవా విక్రయ కాంట్రాక్టుల బహిరంగ వేలం పాటలు నిర్వహించారు. వచ్చే అక్టోబర్ 10న శనివారం అమావాస్య పుణ్యదినం రానుండటంతో స్వామివారి దర్శనానికి వచ్చే భక్తుల సౌకర్యార్థం పూజా సామాగ్రి, లడ్డూ-పులిహోర, కొబ్బరికాయలు, నవధాన్యాల విక్రయంతో పాటు సైకిల్ స్టాండ్ నిర్వహణకు ఈ వేలం పాటలు చేపట్టినట్లు ఆలయ కార్యనిర్వాహణాధికారి గింజుపల్లి వేణు తెలిపారు. వేలం పాటల్లో తీవ్ర పోటీ నడుమ లడ్డూ, పులిహోర విక్రయించే హక్కులను నిజామాబాద్‌కు చెందిన జి.సురేష్ રૂ.47 వేలకు పాడుకున్నారు. కొబ్బరికాయలు, నవధాన్యాలు విక్రయించే హక్కులను జానకంపేట్ కు చెందిన ఎ.సిద్దు రూ. 55 వేలకు దక్కించుకోగా, సైకిల్ స్టాండ్ నిర్వహణ హక్కులను అదే గ్రామానికి చెందిన సుమన్ రూ.10 వేలకు పాడుకున్నారని ఈవో వెల్లడించారు. భక్తులకు ఎలాంటి అసౌకర్యం కలగకుండా వేలం దక్కించుకున్న వ్యాపారులు నాణ్యమైన సేవలు అందించాలని సూచించారు. ఈ కార్యక్రమంలో జిల్లా ఎండోమెంట్ ఇన్‌స్పెక్టర్ సుజాత రెడ్డి, ఆలయ ధర్మకర్తల మండలి చైర్మన్ చిలుక రవికుమార్, ఆలయ డైరెక్టర్లు, గ్రామ పెద్దలు పాల్గొన్నారు.

పర్యావరణ పరిరక్షణతో పాటు మొక్కల పట్ల ప్రేమానురాగాలను పెంపొందించుకోవడమే ధ్యేయంగా సాలూర జిల్లా పరిషత్ ఉన్నత పాఠశాలలో ‘వృక్ష రక్షాబంధన్’ వేడుకను గురువారం ఘనంగా నిర్వహించారు. పచ్చని చెట్లే మానవాళికి శ్వాస అని చాటుతూ పాఠశాల ఆవరణలోని మొక్కలకు ఉపాధ్యాయులు, విద్యార్థులు ఎంతో మమకారంతో రాఖీలు కట్టారు. నాటిన ప్రతి ఒక్క మొక్కను సొంత బిడ్డలా కాపాడుకుంటామని ఈ సందర్భంగా ప్రణామం చేసి ప్రతిజ్ఞ పూనారు. జీవశాస్త్ర ఉపాధ్యాయులు రుద్ర సంతోష్ యాదవ్, విఠల్ కాంబ్లేల ఆద్వర్యంలో ఈ కార్యక్రమం సాగింది. ఈ సందర్భంగా ఇన్‌ఛార్జ్ ప్రధానోపాధ్యాయులు విజయ్ కుమార్ మాట్లాడుతూ... ప్రకృతి ప్రత్యక్ష దైవమని, భవిష్యత్ తరాల నివాసానికి చెట్లే కల్పతరువులని స్పష్టం చేశారు. విద్యార్థి దశ నుంచే పర్యావరణంపై బాధ్యతను పెంచేందుకు ఇలాంటి పండుగలు ఎంతగానో ఉపయోగపడతాయని తెలిపారు. ఈ కార్యక్రమంలో ఉపాధ్యాయులు జ్యోత్స్నా, విజయలక్ష్మి, అరుణ్ కుమార్, గంధం సాయిలు, అబ్బయ్య, సుధారాణి, స్వామి, రాజ్ కుమార్, లక్ష్మి, స్వర్ణ, విక్రమ్, శ్రీకాంత్‌లతో పాటు విద్యార్థులు పాల్గొన్నారు.

కేంద్ర ఎన్నికల సంఘం ఆదేశాల మేరకు చేపడుతున్న ఎస్‌ఐఆర్-2026 ప్రత్యేక సవరణ ప్రక్రియను పారదర్శకంగా నిర్వహిస్తున్నట్లు బోధన్ ఆర్డీఓ ఎం.విజయకుమారి తెలిపారు. ప్రక్రియలో భాగమైన ప్రత్యేక విచారణ కార్యక్రమాన్ని బోధన్ పట్టణంలోని గంజ్ రోడ్డులోని 61వ పోలింగ్ కేంద్రం వద్ద తహసీల్దార్‌ విట్టల్ తో, బోధన్ మండలం ఖండ్గావ్‌లోని 1వ కేంద్రం వద్ద ఎంపీడీఓతో కలిసి పర్యవేక్షించారు. ఆన్‌లైన్ ద్వారా ఓటర్ల వివరాలను సరిచూశారు. ఈ సందర్భంగా ఆర్డీఓ మాట్లాడుతూ.. నోటీసులు అందిన వ్యక్తులు నిర్దేశిత ధ్రువీకరణ పత్రాలతో విచారణకు హాజరుకాకపోతే ఓటు హక్కు రద్దయ్యే ప్రమాదముందని, ఓటర్లంతా ఈ అవకాశాన్ని వినియోగించుకోవాలని ఆమె సూచించారు.

గ్రామస్థాయి విద్యార్థులు కూడా అంతర్జాతీయ స్థాయిలో ఉద్యోగ అవకాశాలు సాధించేలా పాఠశాలల్లో విద్యను అందించాలని బోధన్ రెవెన్యూ డివిజినల్ అధికారిణి ఎం.విజయకుమారి పేర్కొన్నారు. గురువారం బోధన్ మండలం ఖండ్గావ్‌ గ్రామంలోని ప్రాథమిక పాఠశాలను ఆమె అకస్మాత్తుగా సందర్శించారు. పాఠశాలలో మధ్యాహ్న భోజన వసతులను, వంటశాలను పరిశీలించి, ఆహార నాణ్యతను తనిఖీ చేశారు. అనంతరం ఉపాధ్యాయులతో ముచ్చటించి, రాష్ట్ర ప్రభుత్వ మార్గనిర్దేశాలకు అనుగుణంగా బోధనా పద్ధతులు ఉండాలని సూచించారు. చిన్నతనం నుంచే గణితం, ఆంగ్ల మాధ్యమాల్లో నాణ్యమైన విద్యను అందించాల్సిన అవసరం ఉందన్నారు. అనంతరం విద్యార్థులతో ముచ్చటించి వారిలో ఉన్నత ఆశయాలపై స్ఫూర్తి నింపారు.

​ఎస్సీ, ఎస్టీ అట్రాసిటీ కేసుల్లో బాధితులకు సత్వర న్యాయం జరిగేలా అధికారులు పక్కా ఆధారాలతో, నిర్ణీత వ్యవధిలో చార్జ్‌షీట్లు ఫైల్ చేయాలని నిజామాబాద్ జిల్లా కలెక్టర్ భవేష్ మిశ్రా ఆదేశించారు. గురువారం సమీకృత జిల్లా కార్యాలయాల సముదాయంలో ఆయన అధ్యక్షతన ఎస్సీ, ఎస్టీ అట్రాసిటీ విజిలెన్స్ అండ్ మానిటరింగ్ కమిటీ సమావేశం జరిగింది. ఈ సందర్భంగా నిజామాబాద్, బోధన్, ఆర్మూర్ డివిజన్ల వారీగా కేసుల పురోగతిని సమీక్షించిన ఆయన, గత సమావేశ నిర్ణయాల అమలుతీరుపై ఆరా తీశారు.

​బాధితులకు ప్రభుత్వం నుంచి అందాల్సిన నష్టపరిహారం, ఇతర సహాయ సహకారాలు అందించడంలో ఎలాంటి జాప్యం జరగకూడదని స్పష్టం చేశారు. కేసుల త్వరిత పరిష్కారానికి పోలీస్, రెవెన్యూ శాఖలు సమన్వయంతో వ్యవహరించాలన్నారు. దళిత, గిరిజన వర్గాల ప్రజలకు వారి హక్కులపై అవగాహన కల్పించేందుకు ప్రతి నెలా ‘సివిల్ రైట్స్ డే’ను తప్పనిసరిగా నిర్వహించాలని సూచించారు. గ్రామీణ ప్రాంతాల్లో సాంఘిక బహిష్కరణ వంటి అనాగరిక ఘటనలు చోటుచేసుకుంటే బాధ్యులపై కఠిన చర్యలు తీసుకోవాలని ఆదేశించారు. ఎస్సీ, ఎస్టీలకు చెందిన అసైన్డ్ భూములు ఆక్రమణకు గురైతే తమ దృష్టికి తీసుకురావాలని, 'భూభారతి' ద్వారా బాధితులకు న్యాయం చేస్తామని తెలిపారు.

​ఈ సమావేశంలో అదనపు డీసీపీ శుభం నగ్రాలే, జిల్లా రెవెన్యూ అధికారిణి గీత, జిల్లా సాంఘిక సంక్షేమాభివృద్ధి అధికారిణి రజిత, పలువురు ఏసీపీలు, కలెక్టరేట్ సిబ్బంది, కమిటీ సభ్యులు పాల్గొన్నారు.

అర్హత కలిగిన ప్రతి ఓటరు పేరు జాబితాలో తప్పకుండా ఉండేలా క్షేత్రస్థాయి సిబ్బంది ప్రత్యేక శ్రద్ధ చూపాలని నిజామాబాద్ జిల్లా కలెక్టర్ భవేష్ మిశ్రా ఆదేశించారు. స్పెషల్ ఇంటెన్సివ్ రివిజన్  ప్రక్రియలో భాగంగా నిజామాబాద్ నగరంలోని 19వ డివిజన్ కంటేశ్వర్‌లో బి.ఎల్.ఓ లు ఇంటింటికీ తిరిగి నోటీసులు అందజేస్తున్న తీరును ఆయన గురువారం స్వయంగా పరిశీలించారు.

​2002 ఓటరు జాబితాతో మ్యాపింగ్ జరగని వారికి, పేరు లేదా వయస్సులో వ్యత్యాసాలున్న వారికి హియరింగ్ కోసం నోటీసులు ఇస్తున్న విధానాన్ని, సిబ్బంది పనితీరును కలెక్టర్ అడిగి తెలుసుకున్నారు. నోటీసు ఇచ్చే సమయంలోనే ఓటర్లు ధృవీకరణ పత్రాలు అందజేస్తే వాటిని స్వీకరించాలని, నిర్ణీత సమయానికి రాలేని వారికి మరోసారి నోటీసు ఇవ్వాలని సూచించారు. ఎన్నికల సంఘం మార్గదర్శకాలను తు.చ తప్పకుండా పాటిస్తూ నిర్ణీత గడువులోగా ఈ ప్రక్రియను పక్కాగా పూర్తి చేయాలని స్పష్టం చేశారు. ఈ కార్యక్రమంలో నగర పాలక సంస్థ కమిషనర్ దిలీప్ కుమార్ తదితర అధికారులు పాల్గొన్నారు.

బాన్సువాడ,ఆగస్టు 27(డిడి9 వార్త): బాన్సువాడ పట్టణంలోని తాడ్కోల్ చౌరస్తా వద్ద గురువారం ఉదయం విషాదకర ఘటన చోటుచేసుకుంది. పాఠశాలకు వెళ్తున్న ఏడేళ్ల బాలికను మహారాష్ట్రకు చెందిన లారీ ఢీకొనడంతో ఆమె అక్కడికక్కడే మృతి చెందింది.స్థానికుల వివరాల ప్రకారం.. లారీ డ్రైవర్ అతివేగంగా, నిర్లక్ష్యంగా వాహనం నడుపుతూ పాఠశాలకు వెళ్తున్న బాలికను ఢీకొట్టినట్లు తెలుస్తోంది.ప్రమాదంలో బాలిక లారీ టైర్ల కింద పడి తీవ్రంగా గాయపడి అక్కడికక్కడే మృతి చెందినట్లు సమాచారం.ప్రమాద సమాచారం అందుకున్న వెంటనే పోలీసులు సంఘటనా స్థలానికి చేరుకుని పరిస్థితిని పరిశీలించారు.ప్రమాదానికి గల కారణాలపై వివరాలు సేకరిస్తున్నారు.మృతదేహాన్ని పోస్టుమార్టం నిమిత్తం బాన్సువాడ ఏరియా ఆసుపత్రికి తరలించారు.బాలిక మృతితో తల్లిదండ్రులు, కుటుంబ సభ్యులు కన్నీరుమున్నీరుగా విలపించారు.వారి రోదనలు అక్కడున్న వారిని సైతం కంటతడి పెట్టించాయి.చిన్నారి మృతితో బాన్సువాడ పట్టణంలో విషాదఛాయలు అలుముకున్నాయి.ఈ ఘటనపై పోలీసులు కేసు నమోదు చేసి దర్యాప్తు చేస్తున్నట్లు సమాచారం.

సాలూర మండలం హున్స మండల పరిషత్ ఉన్నత పాఠశాలలో సైన్స్ ల్యాబ్ భవన నిర్మాణం, ప్రయోగ పరికరాల కొనుగోలుకు సమగ్ర శిక్షా అభియాన్ కింద రూ. 26 లక్షలు మంజూరయ్యాయి. ఈ మేరకు రాష్ట్ర స్కూల్ ఎడ్యుకేషన్ డైరెక్టర్ డాక్టర్ ఈ.నవీన్ నికోలస్ ఉత్తర్వులు జారీ చేసినట్లు గ్రామ సర్పంచ్ మర్కల్ శివకుమార్ బుధవారం వెల్లడించారు. ల్యాబ్ ఏర్పాటుకు పాఠశాలను ఎంపిక చేయించడమే కాకుండా, నిధుల మంజూరుకు ప్రత్యేక కృషి చేసిన ఎమ్మెల్యే పొద్దుటూరి సుదర్శన్ రెడ్డికి ఈ సందర్భంగా ఆయన గ్రామస్తుల తరుపున ప్రత్యేక కృతజ్ఞతలు తెలిపారు. ఈ సైన్స్ ల్యాబ్ అందుబాటులోకి వస్తే గ్రామీణ విద్యార్థులకు ఎంతగానో ఉపయోగపడుతుందన్నారు. పాఠ్యాంశాలను కేవలం సిద్ధాంత పరంగా కాకుండా ప్రయోగాత్మకంగా బోధించడం వల్ల విద్యార్థుల్లో సైన్స్ పట్ల ఆసక్తి, జిజ్ఞాస పెరుగుతాయని సర్పంచ్ పేర్కొన్నారు.

:వర్ని మండలం ​తగిలేపల్లి మాజీ సర్పంచ్‌ వెంకటేశ్‌ హత్య ఘటనను రాజకీయ ప్రయోజనాలకు వాడుకోవద్దని బీఆర్‌ఎస్‌ నాయకులు కోరారు. ఈ ఘటనను అడ్డం పెట్టుకుని శాంతిభద్రతలకు విఘాతం కలిగించేలా వ్యవహరిస్తున్నారని ఆరోపిస్తూ డీసీసీబీ మాజీ అధ్యక్షుడు పోచారం భాస్కర్‌రెడ్డిపై చర్యలు తీసుకోవాలని బుధవారం బోధన్ ఏసీపీ శ్రీనివాస్‌కు ఫిర్యాదు అందజేశారు. ​ఈ సందర్భంగా బీఆర్‌ఎస్‌ నాయకులు మాట్లాడుతూ... హత్య ఘటనతో ఎలాంటి సంబంధం లేకపోయినప్పటికీ మాజీ ఎమ్మెల్యే బాజిరెడ్డి గోవర్ధన్‌పై భాస్కర్‌రెడ్డి అనుచిత విమర్శలు చేస్తూ, దిష్టిబొమ్మ దహనం చేయడాన్ని ఖండించారు. నిజమైన నిందితులెవరో సమగ్ర విచారణలో తేలాల్సి ఉందన్నారు. సున్నితమైన అంశంలో ప్రజలను రెచ్చగొట్టేలా వ్యవహరిస్తున్న భాస్కర్‌రెడ్డిపై చట్టపరమైన చర్యలు తీసుకోవాలని పోలీసులను కోరారు. ఫిర్యాదు చేసిన వారిలో బీఆర్‌ఎస్‌ నాయకులు జుబేర్‌, అంజిరెడ్డి, బీర్కూర్‌ సర్పంచ్‌ ధర్మతేజ, తెళ్ల రవికుమార్‌ తదితరులు ఉన్నారు.

ఎడపల్లి మండలంలోని జానకంపేట్ ​శివార్లలో గల ప్రసిద్ధ శ్రీ లక్ష్మీ నరసింహ స్వామి దేవస్థానం పాలకమండలి డైరెక్టర్‌గా నియమితులైన జింక లింగం ను బుధవారం తెలంగాణ లోకల్ ఫోర్స్  వ్యవస్థాపక అధ్యక్షుల ఆధ్వర్యంలో మండల కేంద్రంలో ఘనంగా సన్మానించారు. ​ఈ సందర్భంగా డైరెక్టర్ జింక లింగం మాట్లాడుతూ... లక్ష్మీ నరసింహ స్వామి ఆలయ కమిటీ డైరెక్టర్‌గా నియామకమై స్వామివారికి సేవ చేసుకునే భాగ్యం దక్కడం తన పూర్వజన్మ సుకృతమని సంతోషం వ్యక్తం చేశారు. పాలకవర్గ సభ్యులతో సమన్వయం చేసుకుంటూ ఆలయ సమగ్ర అభివృద్ధికి శక్తివంచన లేకుండా కృషి చేస్తానని తెలిపారు. ​ఈ కార్యక్రమంలో ఉప సర్పంచ్ మచ్కూరి గంగాధర్, కాంగ్రెస్ గ్రామ కమిటీ అధ్యక్షుడు దౌర్ రత్నాకర్ రెడ్డి, కిసాన్ ఖేత్ మండల అధ్యక్షుడు శ్రీరామ్ ప్రసాద్, యూత్ కాంగ్రెస్ నాయకులు ఇరెండ్ల నవీన్, సీనియర్ నాయకులు మైదాం ప్రతాప్ రెడ్డి, రావుట్ల స్వామి గౌడ్, రాజ్ కుమార్, సుధాకర్, చిన్న గంగారాం తదితరులు పాల్గొన్నారు.

జిల్లా స్థాయి చెస్ పోటీల్లో ప్రతిభ చాటి విజేతలుగా నిలిచిన సాయి సామల చెస్ అకాడమీ విద్యార్థులను బుధవారం బోధన్ పట్టణంలోని ఆర్య సమాజ్‌లో ఘనంగా సన్మానించారు. ఈ కార్యక్రమానికి విద్యా వికాస్ విద్యా సంస్థల అధినేత​ శ్రీనివాస్ ముఖ్య అతిథిగా హాజరై విద్యార్థులను అభినందించారు. ​ఇటీవల జరిగిన జిల్లా స్థాయి అండర్-17 పోటీల్లో రిష్విక్ బొర్రోల్లా ఛాంపియన్‌గా, గౌరాంగ అశోక్ రన్నరప్‌గా నిలిచారు. అండర్-13 విభాగానికి సంబంధించి గౌరాంగ అశోక్ ఛాంపియన్‌గా నిలవగా... సామల సాయి సుహాస్, మాదయ్య హితేంద్ర, ల్యాడ్లీ బ్రహ్మిణి రాష్ట్ర స్థాయి పోటీలకు ఎంపికయ్యారు. ఈ సందర్భంగా శ్రీనివాస్ మాట్లాడుతూ...చదరంగం విద్యార్థుల్లో వ్యూహాత్మక ఆలోచనను, ఏకాగ్రతను పెంపొందిస్తుందన్నారు. విజేతలైన విద్యార్థులతో పాటు అకాడమీకి సెప్టెంబర్ 5న నగదు బహుమతులు అందజేయనున్నట్లు తెలిపారు. బోధన్ నుంచి జాతీయ స్థాయి క్రీడాకారులను తీర్చిదిద్దడమే తమ లక్ష్యమని కోచ్ సాయిబాబా సామల పేర్కొన్నారు. కార్యక్రమంలో విద్యార్థులు, తల్లిదండ్రులు పాల్గొన్నారు.