"భావే కొంపముంచాడు" 
తెలంగాణ రాజకీయాల్లో మళ్లీ కాళేశ్వరం ప్రాజెక్ట్‌ వివాదం చర్చనీయాంశమైంది. తాజాగా ఎమ్మెల్సీ కల్వకుంట్ల కవిత మీడియా సమావేశంలో చేసిన వ్యాఖ్యలు ఈ వ్యవహారానికి కొత్త మలుపు తిప్పాయి. ఆమె స్పష్టంగా కొన్ని బీఆర్ఎస్ నేతల పేర్లు ప్రస్తావిస్తూ, కాళేశ్వరం అవినీతి వెనుక ఎవరు ఉన్నారో బహిర్గతం చేశారు.

కవిత మాట్లాడుతూ, కాళేశ్వరం ప్రాజెక్ట్‌లో చోటు చేసుకున్న భారీ అవినీతి వెనుక హరీష్ రావు, సంతోష్ రావు, మేఘా కృష్ణారెడ్డి ఉన్నారని ఘాటు ఆరోపణలు చేశారు. “భావే కొంపముంచాడు… మేఘా దోపిడీ వెనుక ముగ్గురే కారణం” అని ఆమె నేరుగా వ్యాఖ్యానించడం రాజకీయ వర్గాల్లో పెద్ద చర్చకు దారితీసింది. అంతేకాక, ఈ అవినీతి కారణంగానే తన తండ్రి కేసీఆర్‌పై ఆరోపణలు మోపబడ్డాయని, ఆయన ఇరిగేషన్ మంత్రిగా హరీష్ రావును తొలగించాల్సి వచ్చిందని వెల్లడించారు.

కవిత తన భావోద్వేగాన్ని దాచుకోలేకపోయారు. “ఈ వయస్సులో మా నాన్న మీద సీబీఐ విచారణ జరగడం కడుపు రగిలిపోతోంది. దేవుడి లాంటి మా నాన్నను ఇంతవరకు ఎవరూ మచ్చ పెట్టలేకపోయారు. కానీ, ఇప్పుడు ఇతరుల తప్పుల వలన ఆయన అనవసరంగా ఆరోపణలు ఎదుర్కొంటున్నారు” అని ఆమె ఆవేదన వ్యక్తం చేశారు.

అంతేకాక, ప్రస్తుత ముఖ్యమంత్రి రేవంత్ రెడ్డి పేరును కవిత ప్రస్తావించారు. “ఈ ముగ్గురినీ సీఎం వెనకేసుకొస్తున్నారు. ప్రభుత్వం నిజంగా తలుచుకుంటే అవినీతి బయటపడకుండా ఉండదు. కానీ వారిని కాపాడుతున్నారు” అంటూ మండిపడ్డారు.

ఈ వ్యాఖ్యలతో కాళేశ్వరం ప్రాజెక్ట్ చుట్టూ మళ్లీ తీవ్ర చర్చ ప్రారంభమైంది. రాజకీయ విశ్లేషకులు అభిప్రాయపడుతూ, కవిత చేసిన ఈ సంచలన ఆరోపణలు రాబోయే రోజుల్లో రాష్ట్ర రాజకీయాలపై ప్రభావం చూపే అవకాశముందని అంటున్నారు. ముఖ్యంగా కేసీఆర్‌పై జరుగుతున్న సీబీఐ విచారణ, హరీష్ రావు తొలగింపు, మేఘా కృష్ణారెడ్డి పేరు ప్రస్తావన  కలిపి ఈ వివాదం మరింత వేడెక్కించేలా చేశాయి.