అక్టోబర్ 7, (డిడి 9 వార్త):

​భద్రాచలం పట్టణంలో దొంగల వరుస దాడులు స్థానికులను ఉలికిపాటుకు గురిచేస్తున్నాయి. కేవలం వారం రోజుల వ్యవధిలోనే ఒకే ప్రాంతంలో అమ్మవారి ఆలయాలు, మండపాలను లక్ష్యంగా చేసుకొని రెండు చోరీలకు పాల్పడటం తీవ్ర ఆందోళన కలిగిస్తోంది.

​తాజాగా, భద్రాచలం పట్టణంలోని భగవాన్ దాస్ కాలనీ, గ్యాస్ గోదాం సమీపంలో ఉన్న ముత్యాలమ్మ ఆలయాన్ని దొంగలు లక్ష్యంగా చేసుకున్నారు. సోమవారం రాత్రి ఆలయ తాళాలు పగలగొట్టిన దుండగులు, గుడిలోని హుండీని పగులగొట్టి అందులోని నగదును అపహరించారు.

​ఇదిలా ఉండగా, సరిగ్గా వారం రోజుల క్రితం ఇదే ప్రాంతంలో మాజీ ఎమ్మెల్యే ఇంటి ఆవరణంలో దసరా శరన్నవరాత్రుల సందర్భంగా ఏర్పాటు చేసిన అమ్మవారి మండపంలోని హుండీని కూడా దుండగులు అపహరించారు.

​కేవలం వారం రోజుల్లో ఒకే ఏరియాలో, రెండుసార్లు అమ్మవారి హుండీలను అపహరించడం స్థానిక భక్తులను, ప్రజలను ఆశ్చర్యానికి, ఆగ్రహానికి గురిచేస్తోంది. పండుగ వేళ ఇలాంటి ఘటనలు జరగడంపై ప్రజలు భద్రత పట్ల ఆందోళన వ్యక్తం చేస్తున్నారు. పోలీసులు తక్షణమే ఈ వరుస దొంగతనాలను అరికట్టి, నిందితులను పట్టుకోవాలని స్థానికులు డిమాండ్ చేస్తున్నారు.