హైదరాబాద్‌,అక్టోబర్ 8,(డిడి9 వార్త):జూబ్లీహిల్స్‌ నియోజకవర్గంలో జరగనున్న ఉప ఎన్నికల కోసం కాంగ్రెస్‌ పార్టీ నవీన్‌ యాదవ్‌ పేరును అధికారిక అభ్యర్థిగా ప్రకటించింది. ఈ నిర్ణయంతో కాంగ్రెస్‌ శిబిరంలో ఉత్సాహం నెలకొంది. ప్రజల్లో చురుకైన, సేవామనస్కుడిగా పేరుపొందిన నవీన్‌ యాదవ్‌ ఇప్పటికే ప్రజా పరిచయంతో ముందంజలో ఉన్నారని పార్టీ వర్గాలు పేర్కొన్నాయి.

గతంలో జూబ్లీహిల్స్‌ ప్రాంతంలో అభివృద్ధి పనులు, ప్రజా సమస్యల పరిష్కారంలో కీలక పాత్ర పోషించిన నవీన్‌ యాదవ్‌ ఈ సారి ప్రజల ఆశీస్సులతో విజయం సాధిస్తారనే నమ్మకాన్ని కాంగ్రెస్‌ నేతలు వ్యక్తం చేస్తున్నారు.

ఇక బీఆర్‌ఎస్‌ మాజీ ఎమ్మెల్యే మాగంటి గోపీనాథ్‌ సతీమణి సునీతను కూడా అభ్యర్థిగా ప్రకటించడం ఎన్నికల పోటీలో కొత్త ఉత్కంఠను తెచ్చింది. టీడీపీ, ఎంఐఎం, బీజేపీ వంటి ఇతర పార్టీల నుంచి కూడా అభ్యర్థుల ప్రకటనలు సమీప రోజుల్లో వెలువడనున్నాయి.

జూబ్లీహిల్స్‌ నియోజకవర్గ ప్రజలకు ఈ ఎన్నిక కేవలం రాజకీయ పోటీ కాకుండా అభివృద్ధి, విశ్వాసం, సేవామార్గంలో కొనసాగుతున్న నూతన దిశగా మారనుంది.