ఖిల్లా రామాలయానికి రోప్‌వే డీపీఆర్ సిద్ధం చేయాలి : ఎమ్మెల్యే ధన్‌పాల్ సూర్యనారాయణ

నియోజకవర్గానికి సంబంధించి రోడ్లు, భవనాల శాఖ పనుల్లో వేగం పెంచాలని, అభివృద్ధిలో పురోగతి సాధించాలని నిజామాబాద్ అర్బన్ ఎమ్మెల్యే ధన్‌పాల్ సూర్యనారాయణ స్పష్టం చేశారు. నగరంలోని సుభాష్ నగర్ క్యాంప్ కార్యాలయంలో ఆర్ అండ్ బీ అధికారులతో ఆయన మంగళవారం సమీక్ష నిర్వహించారు. ఈ సందర్భంగా ఎమ్మెల్యే మాట్లాడుతూ.. నిజామాబాద్‌లోని చారిత్రక కట్టడమైన ఖిల్లా రామాలయ అభివృద్ధి కోసం తాము చేస్తున్న ప్రయత్నాలు ఫలిస్తున్నాయని తెలిపారు. ఆలయ అభివృద్ధిని కేంద్ర, రాష్ట్ర ప్రభుత్వాల దృష్టికి తీసుకెళ్లగా.. సానుకూలంగా స్పందించి రోప్‌వే ఏర్పాటుకు డీపీఆర్ (సవివర ప్రాజెక్టు నివేదిక) సిద్ధం చేయాలని ఆదేశించినట్లు వెల్లడించారు. ఇటీవల ఆర్ అండ్ బీ అధికారులతో పాటు రోప్‌వే నిర్మాణ సంస్థ ప్రతినిధులు క్షేత్రస్థాయిలో పరిశీలన జరిపిన విషయాన్ని గుర్తుచేశారు. నగరంలో పెండింగ్‌లో ఉన్న పనులను ఏమాత్రం ఆలస్యం చేయకుండా యుద్ధప్రాతిపదికన పూర్తి చేయాలని అధికారులనుa ఆదేశించారు.

​అంతకుముందు పబ్లిక్ హెల్త్ అధికారులతోనూ ఎమ్మెల్యే ప్రత్యేకంగా సమావేశమయ్యారు. ఇందూరులో కొనసాగుతున్న అండర్‌గ్రౌండ్ డ్రైనేజీ, ట్యుఫిడ్స్ (TUIDFIC) రూ. 60 కోట్ల అభివృద్ధి పనుల పురోగతిపై సుదీర్ఘంగా చర్చించారు. ప్రధానంగా యూజీడీ పనులు నత్తనడకన సాగుతుండటంపై అధికారులకు తగిన సూచనలు జేశారు. ప్రజలకు ఇబ్బందులు కలగకుండా నిర్దేశిత గడువులోగా పనులన్నీ పూర్తి చేయాలని స్పష్టం చేశారు. ​ఈ సమావేశంలో ఆర్ అండ్ బీ డీఈలు నాందేవ్, రామ్మోహన్, ఏఈ సాయికుమార్, పబ్లిక్ హెల్త్ డీఈ యోగేష్, ఏఈ శివకృష్ణ, యూజీడీ వర్క్స్ మేనేజర్ జయశంకర్ తదితరులు పాల్గొన్నారు.