బోధన్‌లో అబ్రహం షారన్ కుటుంబీకుల ఆత్మీయ కలయిక

మనిషి ఆయుష్షు శత వసంతాలను తాకడం అరుదు. అలాంటి అపురూపమైన క్షణాలను చూస్తూ, నాలుగు తరాల వారసులు ఒకేచోట చేరి ఆప్యాయతలు పంచుకోవడం మరీ అరుదు. బోధన్ పట్టణంలోని గౌడ్స్ కాలనీలో ఇటువంటి అరుదైన, ఆనందకరమైన ఆత్మీయ వేడుక ఘనంగా జరిగింది. స్థానికంగా నివాసముంటున్న కుటుంబ పెద్ద అబ్రహం షారన్ వంద సంవత్సరాలు దగ్గరపడుతున్న తరుణంలో, ఆయన నేటికీ సంపూర్ణ ఆరోగ్యంతో ఉండటంపై కుటుంబ సభ్యులందరూ హర్షం వ్యక్తం చేశారు. ఈ అపురూప సందర్భాన్ని పురస్కరించుకుని కుటుంబ సభ్యులందరూ ఒక్కచోటకు చేరి సంబరాలు జరుపుకున్నారు.

ఒకే వేదికపై నాలుగు తరాలు..

ఈ అరుదైన కలయికలో అబ్రహం షారన్ సంతానమైన ఐదుగురు పిల్లలతో పాటు వారి జీవిత భాగస్వాములు, మనవళ్లు, మనవరాళ్లు, అల్లుళ్లు, కోడళ్లు అందరూ కలిసి మొత్తం 34 మంది సభ్యులు పాల్గొన్నారు. నాలుగు తరాలను కళ్లారా చూస్తున్న తమ అమ్మానాన్నల పరిపూర్ణ ఆరోగ్యం, వారి ఆశీస్సులు తమకు కొండంత అండగా నిలిచాయని వారు భావోద్వేగంతో తెలిపారు. గత పదేళ్ల క్రితం కేవలం 24 మందిగా ఉన్న తమ కుటుంబం, నేడు 34 మందితో ఎంతో సంతోషంగా వర్ధిల్లుతుండటం తమ అదృష్టమని కుటుంబ సభ్యులు ఆనందం వ్యక్తం చేశారు.

ఆత్మీయ పలకరింపులు.. జ్ఞాపకాల సునామీ..

తమ కుటుంబాన్ని 'అందరి అభినందన గౌరవ సమితి'గా పిలుచుకునే ఈ కుటుంబంలో.. కొడుకులు, కోడళ్లైన జాన్ మార్క్ - సుసన్న, మృత్యుంబాబు - శోభ, సహదేవ్ - కవితలతో పాటు.. కూతుళ్లు, అల్లుళ్లైన అన్నపూర్ణ - ఆనందం, జయ - ప్రభాకర్‌లు అందరూ ఒకే వేదికపైకి వచ్చి ఈ వేడుకను ఎంతగానో ఆస్వాదించారు. పది సంవత్సరాల సుదీర్ఘ విరామం తర్వాత కుటుంబ సభ్యులందరూ ఒకే చోట కలిసి తమ ప్రేమానురాగాలను పంచుకోవడం తమకు ఎంతో సంతృప్తినిచ్చిందని వారు తెలిపారు. భగవంతుని కృపతో తమ కుటుంబ పెద్దలు మరిన్ని ఏళ్లపాటు ఆయురారోగ్యాలతో, అష్టైశ్వర్యాలతో వర్ధిల్లాలని ఈ సందర్భంగా వారు మనసారా ఆకాంక్షించారు.