బీర్కూర్, మార్చి 01(డిడి9 వార్త):
లయన్స్ క్లబ్ అఫ్ బీర్కూర్ ఆధ్వర్యంలో బీర్కూర్లోని మున్నూరుకాపు సంఘ భవనంలో నిర్వహించిన మహత్తర రక్తదాన శిబిరం ఘనవిజయం సాధించింది. సమాజ సేవకు అంకితభావంతో ఏర్పాటు చేసిన ఈ శిబిరంలో మొత్తం 108 మంది స్వచ్ఛంద రక్తదాతలు పాల్గొని రక్తదానం చేసి మానవతకు నిలువెత్తు నిదర్శనంగా నిలిచారు.ప్రాణాపాయ పరిస్థితుల్లో రక్తం కోసం ఎదురుచూస్తున్న రోగులకు అండగా నిలవాలనే సంకల్పంతో యువత, సేవాభావులు, వివిధ వర్గాల ప్రజలు పెద్దఎత్తున ముందుకు రావడం విశేషం. ఒక్కొక్కరి రక్తదానం ఒక ప్రాణాన్ని కాపాడే శక్తి కలిగి ఉందని నిర్వాహకులు పేర్కొన్నారు. దాతల స్పందన ఈ శిబిరాన్ని అత్యంత విజయవంతంగా నిలిపిందన్నారు.రక్తదానం చేసిన ప్రతి దాత నిజమైన హీరో అని, వారి సేవ వల్ల ఎన్నో కుటుంబాల్లో ఆశాకిరణాలు వెలుగుతాయని క్లబ్ ప్రతినిధులు అభినందించారు. కార్యక్రమాన్ని సమర్థవంతంగా నిర్వహించిన క్లబ్ సభ్యులు, వైద్య సిబ్బంది, స్వచ్ఛంద సేవకుల కృషిని వారు ప్రత్యేకంగా ప్రశంసించారు.ఈ సందర్భంగా రక్తదాతలకు ధృవపత్రాలు అందజేసి ఘనంగా సన్మానించారు. రక్తదానం వంటి మహత్తర సేవా కార్యక్రమాలలో ప్రతి ఒక్కరూ పాల్గొని సమాజానికి తమవంతు సేవ చేయాలని నిర్వాహకులు పిలుపునిచ్చారు.“రక్తదానం – ప్రాణదానం” అనే నినాదాన్ని సార్థకం చేస్తూ బీర్కూర్ ప్రజలు మరోసారి తమ సేవాభావాన్ని చాటుకున్నారు.
