బాన్సువాడ, నవంబర్ 26(డిడి9 వార్త): కామారెడ్డి జిల్లా బీర్కూరు మండలంలోని వైఎస్ఆర్ కాలనీలో ప్రాథమిక సౌకర్యాల లేమి కారణంగా ఎదురవుతున్న తీవ్ర సమస్యలను పరిష్కరించాలని కోరుతూ గంగపుత్ర సంఘ సభ్యులు నియోజకవర్గ ఎమ్మెల్యే పోచారం శ్రీనివాస్ రెడ్డికి వినతిపత్రం సమర్పించారు.కాలనీవాసులు మాట్లాడుతూ వైఎస్ఆర్ కాలనీ ఏర్పడి 14 సంవత్సరాలు కావొస్తున్నా ఇప్పటికీ రోడ్లు, డ్రైనేజీ వ్యవస్థలు పూర్తిచేయకపోవడంతో అక్కడి ప్రజలు తీవ్ర ఇబ్బందులు పడుతున్నారు. ముఖ్యంగా వర్షాకాలం వచ్చినప్పుడల్లా కాలనీలో మురికినీళ్లు నిలిచిపోయి దోమల పెరుగుదల, పందుల సంచారం, దుర్వాసన వంటి సమస్యలు రోజురోజుకు పెరుగుతున్నాయి. చిన్న పిల్లలు, వృద్ధుల్లో ఆరోగ్య సమస్యలు కూడా కనిపిస్తున్నాయని కాలనీవాసులు ఆందోళన వ్యక్తం చేస్తున్నారు.అదేవిధంగా, ఇందిరమ్మ ఇండ్ల లబ్ధిదారులు ఇళ్ల నిర్మాణానికి అవసరమైన ఇటుక, ఇసుక వంటి నిర్మాణ సామగ్రిని తీసుకురావడమూ కష్టంగా మారింది. గుంతలతో నిండిన రహదారుల కారణంగా వాహనాలు ఇరుక్కుపోవడం తరచూ జరుగుతోందని వారు పేర్కొన్నారు.ఈ నేపథ్యంలో, కాలనీ ప్రాథమిక సదుపాయాలైన రోడ్లు మరియు డ్రైనేజీ పనులను వెంటనే పూర్తి చేయాలని ఎమ్మెల్యే పోచారంను గంగపుత్ర సభ్యులు, కాలనీ వాసులు కోరారు.
