బాన్సువాడ, నవంబర్ 29(డిడి9 వార్త): “మానవసేవయే మాధవసేవ” అనే నినాదంతో సమాజానికి ఉపయోగపడే పనులు చేయాలని ఎన్ఆర్ఐ డాక్టర్ సునీల్ చౌదరి పిలుపునిచ్చారు. శనివారం బీర్కూరు మండలం కిష్టాపూర్ ప్రాథమిక–ఉన్నత పాఠశాలలో విద్యార్థులకు సుమారు 170 స్పోర్ట్స్ యూనిఫాంలు, 20 డెస్క్–బెంచ్‌లు, ఒక ప్రింటర్, ప్రతి విద్యార్థికి వాటర్ బాటిల్స్ అందజేశారు.ఈ మొత్తం వితరణల విలువ సుమారు రూ. 2 లక్షలు. ఈ సందర్భంగా ఆయన మాట్లాడుతూ ఎంత ఎత్తుకు ఎదిగినా తన మూలాలను మరవకూడదని, గ్రామీణ ప్రాంత ప్రభుత్వ పాఠశాలల్లో చదువుతున్న పిల్లలకు ఎల్లప్పుడూ తన వంతు సహాయం అందిస్తానని తెలిపారు. తాను బీర్కూరు మండలంలోని వెంకటప్పయ్య క్యాంపుకు చెందినవాడినని, ఇక్కడే విద్యను అభ్యసించాడని గుర్తుచేసుకున్నారు.అమెరికాలో స్థిరపడిన తర్వాత కూడా ఈ ప్రాంతం పట్ల తనకు ప్రత్యేకమైన మమకారం ఉందని, విద్యారంగంలో అవసరమైన సేవా కార్యక్రమాలు చేపడుతున్నట్లు చెప్పారు. గతంలో బీర్కూరు ప్రభుత్వ ఉన్నత పాఠశాలకు రూ. 10 లక్షల విలువైన కంప్యూటర్లు అందజేయడంతో పాటు, ఒక కంప్యూటర్ ఫ్యాకల్టీని నియమించి నెలవారీ వేతనం కూడా అందజేస్తున్నట్టు వెల్లడించారు. కంప్యూటర్ల నిర్వహణ, టీచర్ వేతనం చూసుకోవడం తనకు గర్వకారణమని చెప్పారు.ఉద్యోగం ప్రారంభించిన నాటి నుంచి గత 20 సంవత్సరాలుగా సంపాదనలో కొంత భాగాన్ని సమాజ సేవకు, ప్రధానంగా విద్యారంగ అభివృద్ధికి వినియోగిస్తున్నట్టు వివరించారు.ఈ కార్యక్రమంలో పాల్గొన్న ఎంఈఓ వేంకన్న మాట్లాడుతూ, అమెరికాలో ఉన్నా తాను చదువుకున్న పాఠశాలను మరవకుండా సేవా కార్యక్రమాలు చేయడం గొప్ప విశేషమని ప్రశంసించారు. సుమారు 60 ట్రస్టుల ద్వారా సునీల్ చౌదరి చేపడుతున్న సేవలను కొనియాడారు. దానం చేస్తే భగవంతుడు రెట్టింపు ఇస్తాడని, సమాజానికి స్ఫూర్తినిచ్చే కార్యక్రమాలు మరింత చేపట్టాలని అన్నారు.కార్యక్రమంలో పాఠశాల ప్రధానోపాధ్యాయులు ప్రసన్నలత, రిటైర్డ్ ఉపాధ్యాయులు మేకల విట్టల్, ఉపాధ్యాయులు రాధాకృష్ణ, దుర్గాప్రసాద్, డాక్టర్ నర్సింగ్ రెడ్డి, సునీల్ చౌదరి తల్లిగారు, ఉపాధ్యాయులు నాగరాజు, ఖాజీ, పాఠశాల బృందం, విద్యార్థులు, మాజీ ఉపసర్పంచ్ నర్సారెడ్డి, యువ నాయకులు బుజ్జిముల భాస్కర్, గ్రామస్తులు తదితరులు పాల్గొన్నారు.
