కామారెడ్డి, నవంబర్ 27(డిడి9 వార్త): దేవునిపల్లి పోలీస్ స్టేషన్ పరిధిలో పోలీసులని చెప్పి బెదిరించి, ఓ వ్యక్తి వద్ద నుండి నగదు మరియు మొబైల్ ఫోన్ దోచుకున్న ముగ్గురు నిందితుల్లో ఇద్దరిని పోలీసులు అరెస్ట్ చేసి రిమాండ్‌కు తరలించారు. పరారీలో ఉన్న మరో నిందితుడిని కూడా త్వరలో పట్టుకునేందుకు ప్రయత్నాలు కొనసాగుతున్నాయని అధికారులు తెలిపారు.ఈ ఘటనలో రూ.1,800 నగదు, ఒక మొబైల్ ఫోన్ లాక్కున్నట్టు ఫిర్యాదు రావడంతో కేసు నమోదు చేసి దర్యాప్తు ప్రారంభించినట్లు పోలీసులు వెల్లడించారు. నవంబర్ 26న వాహనాల తనిఖీ చేస్తుండగా సరంపల్లి ఎక్స్ రోడ్ వద్ద అనుమానాస్పదంగా సంచరిస్తున్న తెల్ల రంగు హ్యుందాయ్ క్రెటా కారును పోలీసులు ఆపగా, డ్రైవర్ పారిపోడానికి ప్రయత్నించినప్పటికీ అతన్ని అదుపులోకి తీసుకున్నారు. అతడితో పాటు మరో వ్యక్తిని కూడా అక్కడికక్కడే అరెస్టు చేశారు.విచారణలో నిందితుడు జింక భాస్కర్ తన స్నేహితులు నవీన్ గౌడ్, లక్ష్మణ్‌లతో కలిసి చిన్న మల్లారెడ్డి శివారులో ఎల్లమ్మ దేవాలయం వద్ద ఒక వ్యక్తిని పోలీసులమని నమ్మించి బెదిరించి, బలవంతంగా నగదు మరియు మొబైల్ ఫోన్ దోచుకున్నట్లు తేలింది.పోలీసులు నిందితుల వద్ద నుండి ఒక మొబైల్ ఫోన్ మరియు హ్యుందాయ్ క్రెటా కారును స్వాధీనం చేసుకున్నారు.జిల్లా ఎస్పీ యం. రాజేష్ చంద్ర మాట్లాడుతూ, ప్రజలను బెదిరించడం, పోలీసుల పేరుతో అక్రమాలకు పాల్పడటం వంటి చర్యలకు కఠినంగా వ్యవహరించబడుతుందని హెచ్చరించారు. ఏవైనా అనుమానాస్పద చర్యలు, దోపిడీలు చోటుచేసుకున్న వెంటనే పోలీసులకు సమాచారం అందించాలని ప్రజలను ఆయన కోరారు.
