నేటి నుంచి జాన్కంపేట్‌లో పోలీస్ ఫైరింగ్ శిక్షణ

నిజామాబాద్ జిల్లా ఎడపల్లి మండలంలోని జాన్కంపేట్ పోలీస్ ట్రైనింగ్ సెంటర్ (పీటీసీ)లో శనివారం నుంచి ఫైరింగ్ శిక్షణ కార్యక్రమం ప్రారంభం కానుంది. ఈ మేరకు ఎడపల్లి సబ్ ఇన్‌స్పెక్టర్ ముత్యాల రమ ఒక ప్రకటన విడుదల చేశారు. నేటి నుంచి వచ్చే నెల 2వ తేదీ వరకు మొత్తం 10 రోజుల పాటు ఈ శిక్షణ కొనసాగుతుందని ఆమె పేర్కొన్నారు.

​ఉదయం 6 నుంచి 10 వరకు..

​ఈ ఫైరింగ్ శిక్షణ ప్రతిరోజూ ఉదయం 6 గంటల నుంచి 10 గంటల వరకు జరుగుతుందని తెలిపారు. ఈ సమయంలో పీటీసీ పరిసర ప్రాంతాల ప్రజలు, ముఖ్యంగా చేను పనులకు వెళ్లే రైతులు, పశువుల కాపరులు అత్యంత అప్రమత్తంగా ఉండాలని హెచ్చరించారు. శిక్షణ జరుగుతున్న సమయంలో ఎవరూ కూడా ఆ ప్రాంతం వైపు వెళ్లరాదని, పశువులను అటువైపు తోలకూడదని స్పష్టం చేశారు.

​ముందస్తు జాగ్రత్తలు తప్పనిసరి

​ఎలాంటి అవాంఛనీయ, ప్రమాదకర సంఘటనలు జరగకుండా ముందస్తు జాగ్రత్తగా ఈ హెచ్చరికలు జారీ చేస్తున్నట్లు ఎస్సై రమ వివరించారు. పోలీస్ శిక్షణ సజావుగా సాగేందుకు స్థానిక గ్రామస్థులందరూ పూర్తిస్థాయిలో సహకరించాలని ఆమె కోరారు. అత్యంత ప్రాధాన్యత కలిగిన ఈ సమాచారాన్ని పరిసర గ్రామాల ప్రజలందరికీ చేరవేయాలని గ్రామ సర్పంచ్ అనురాధ కిషన్ గౌడ్ స్థానికులకు విజ్ఞప్తి చేశారు.