తెలంగాణ గడ్డపై సాగునీటి ప్రాజెక్టుల పునరుద్ధరణే లక్ష్యంగా కాంగ్రెస్ ప్రభుత్వం అడుగులు వేస్తోంది. ములుగు జిల్లా కన్నాయిగూడెం మండలంలోని జె. చొక్కారావు దేవాదుల ఎత్తిపోతల పథకాన్ని (JCRDLIS) ఆదివారం సందర్శించిన ముఖ్యమంత్రి శ్రీ ఎ. రేవంత్ రెడ్డి, ప్రాజెక్టును త్వరితగతిన పూర్తి చేసేందుకు భారీ ఊతాన్నిచ్చారు. దేవాదుల భూసేకరణ కోసం జూన్ 2వ తేదీలోపు రూ. 600 కోట్లు మంజూరు చేస్తామని సీఎం సంచలన ప్రకటన చేశారు. మంత్రులు ఉత్తమ్ కుమార్ రెడ్డి, ధనసరి అనసూయ సీతక్క, పొంగులేటి శ్రీనివాస రెడ్డిలతో కలిసి పంప్ హౌస్, ఇంటేక్ పాయింట్ వద్ద మోటార్లను క్షుణ్ణంగా పరిశీలించిన ఆయన, నెల రోజుల్లోపు పంప్ మరమ్మతు పనులు పూర్తి చేయాలని అధికారులను ఆదేశించారు. మార్చిలో జరిగే మంత్రివర్గ సమావేశంలో ప్రాజెక్టుకు సంబంధించిన అన్ని అంచనాలకు ఆమోదం తెలుపుతామని, భూసేకరణ జాప్యం వల్ల ప్రాజెక్టు పనులు ఆగడానికి వీల్లేదని ముఖ్యమంత్రి స్పష్టం చేశారు.
నీటి హక్కుల విషయంలో రాజీపడే ప్రసక్తే లేదని, తెలంగాణ వాటాను కాపాడటం తమ బాధ్యతని ముఖ్యమంత్రి పునరుద్ఘాటించారు. రాష్ట్రంలోని అన్ని ప్రాజెక్టుల భూసేకరణ కోసం ప్రత్యేక 'కార్పస్ ఫండ్' ఏర్పాటు చేస్తామని, భూములు కోల్పోయిన రైతులకు 'గ్రీన్ ఛానెల్' ద్వారా పరిహారం అందజేస్తామని భరోసా ఇచ్చారు. గోదావరి, కృష్ణా జలాల్లో తెలంగాణ హక్కులను కాపాడేందుకు పొరుగు రాష్ట్రమైన ఆంధ్రప్రదేశ్తో చర్చలు జరుపుతున్నామని, అవసరమైతే రివర్ మేనేజ్మెంట్ బోర్డులు, ట్రిబ్యునళ్లు, చివరకు సుప్రీంకోర్టు వరకు వెళ్లడానికైనా సిద్ధమని రేవంత్ రెడ్డి ధీమా వ్యక్తం చేశారు. గత పదేళ్లలో విధానపరమైన లోపాల వల్ల ప్రాజెక్టులు నిర్లక్ష్యానికి గురయ్యాయని, రూ. 8.11 లక్షల కోట్ల అప్పుల భారం ఉన్నప్పటికీ రాబోయే రెండేళ్లలో పెండింగ్ ప్రాజెక్టులన్నీ పూర్తి చేసి ఉత్తర తెలంగాణను సస్యశ్యామలం చేస్తామని వెల్లడించారు.
శాసనసభ బడ్జెట్ సమావేశాల్లో గోదావరి నదీ జలాలపై ఒక రోజంతా సమగ్రంగా చర్చిస్తామని, ప్రతిపక్షాల నుండి వచ్చే సహేతుకమైన సూచనలను స్వీకరిస్తామని సీఎం పేర్కొన్నారు. మేడిగడ్డ, అన్నారం, సుందిళ్ల బ్యారేజీలు తెలంగాణ ప్రజల ఆస్తి అని, వాటి లోపాలను శాస్త్రీయంగా విశ్లేషించి పునరుద్ధరిస్తామని స్పష్టం చేశారు. మరోవైపు, ఇటీవల అత్యంత వైభవంగా జరిగిన మేడారం సమ్మక్క-సారలమ్మ జాతరను దక్షిణ కుంభమేళాగా అభివర్ణించిన ఆయన, మేడారాన్ని భక్తులు ఏడాది పొడవునా సందర్శించేలా సర్వతోముఖాభివృద్ధి చేస్తామని, బడ్జెట్ సమావేశాల అనంతరం మరోసారి ఇక్కడికి వచ్చి సమీక్ష నిర్వహిస్తానని ముఖ్యమంత్రి వివరించారు.
About The Author
