రోడ్డు ప్రమాదాల నివారణే లక్ష్యంగా నిజామాబాద్ పోలీస్ కమిషనరేట్ చేపట్టిన “అరైవ్ అలైవ్ – 2026” కార్యక్రమం రెండో దశ శుక్రవారం నగరంలో ఉత్సాహంగా ప్రారంభమైంది. స్థానిక లయన్స్ కంటి ఆసుపత్రి, ఇండియన్ మెడికల్ అసోసియేషన్ సహకారంతో డ్రైవర్ల కోసం ఏర్పాటు చేసిన ఉచిత కంటి మరియు వినికిడి పరీక్షల శిబిరాన్ని జిల్లా పోలీస్ కమిషనర్ పి.సాయి చైతన్య ప్రారంభించారు.
ప్రయాణికుల భద్రతే డ్రైవర్ల బాధ్యత
ఈ సందర్భంగా సీపీ మాట్లాడుతూ... వాహనం నడిపే డ్రైవర్ల చూపు లేదా వినికిడిలో లోపాలు ఉండటం రోడ్డు ప్రమాదాలకు ప్రధాన కారణమవుతున్నాయని ఆందోళన వ్యక్తం చేశారు. డ్రైవర్లు ఎప్పటికప్పుడు తమ ఆరోగ్య పరీక్షలు చేయించుకోవాలని సూచించారు. ప్రయాణికులను సురక్షితంగా గమ్యస్థానాలకు చేర్చాల్సిన బాధ్యత డ్రైవర్లపైనే ఉందని, క్రమశిక్షణతో కూడిన డ్రైవింగ్ ద్వారానే ప్రమాదాలను అరికట్టవచ్చని ఆయన పేర్కొన్నారు.
సమగ్ర పరీక్షలు - ఉచితంగా కళ్లజోళ్ల పంపిణీ
శిబిరంలో భారీ వాహన, ఆటో, అంబులెన్స్ డ్రైవర్లకు వైద్యులు సమగ్రంగా పరీక్షలు నిర్వహించారు. దృష్టి లోపం ఉన్నవారిని గుర్తించి వారికి ఉచితంగా కళ్లజోళ్లు, డ్రాప్స్ మందులను పంపిణీ చేశారు. రోడ్డు ప్రమాదాలు జరిగినప్పుడు క్షతగాత్రులకు ప్రాథమిక చికిత్సగా సి.పి.ఆర్ ఎలా చేయాలో వైద్య నిపుణులు ప్రత్యక్షంగా డ్రైవర్లకు ట్రైనింగ్ ఇచ్చారు. అతి వేగం, లేన్ క్రమశిక్షణ పాటించకపోవడం, అలసటతో వాహనాలు నడపడం ప్రాణాంతకమని సీపీ వివరించారు. ఈ కార్యక్రమంలో అడిషనల్ డీసీపీలు బస్వారెడ్డి, రామ్ చంద్ర రావు, ఏసీపీలు ప్రకాష్, శ్రీనివాస్, వెంకటేశ్వర్ రెడ్డి, రాజశేఖర్, మస్తాన్ అలీ, ఐరాడ్ మేనేజర్ వర్షా నిహాంత్, ఐఎంఏ ప్రతినిధులు డాక్టర్ విశాల్, హరీష్ స్వామి, లయన్స్ హాస్పిటల్ వైద్యులు డాక్టర్ దీప్తి, అలేఖ్య, వైశాలి, వినోద్ కుమార్పో, లీస్ సిబ్బంది పాల్గొన్నారు.
.jpg)
