స్థానిక సంస్థల పాలనలో ప్రజా ప్రతినిధులు క్రియాశీలకంగా వ్యవహరించాలని, ప్రజల సమస్యల పరిష్కారంలో చిత్తశుద్ధితో పనిచేయాలని నిజామాబాద్ జిల్లా కలెక్టర్ ఇలా త్రిపాఠి పిలుపునిచ్చారు. నిజామాబాద్ నగరంలోని భూమారెడ్డి కన్వెన్షన్లో నగర మేయర్, డిప్యూటీ మేయర్, కార్పొరేటర్లు, ఆర్మూర్, బోధన్, భీమ్గల్ మున్సిపల్ చైర్పర్సన్లకు ఏర్పాటు చేసిన శిక్షణా శిబిరాన్ని ఆమె, అర్బన్ ఎమ్మెల్యే ధన్పాల్ సూర్యనారాయణతో కలిసి ప్రారంభించారు.ఈ సందర్భంగా కలెక్టర్ మాట్లాడుతూ.. ప్రజా ప్రతినిధులు కేవలం పాలసీ మేకర్లు మాత్రమే కాదు, ప్రజల సమస్యలను క్షేత్రస్థాయిలో పరిష్కరించే ఎగ్జిక్యూటర్లు. మీ వార్డుకు మీరే సీఈవోలు. మీ పరిధిలోని ఆస్తులను, ట్రేడ్ లైసెన్స్లను సమర్థవంతంగా నిర్వహించి ఆదాయాన్ని పెంచుకోవాలి. రాజీవ్ గాంధీ ఆడిటోరియం వంటి ఆస్తులను ఆధునీకరించి, ఆదాయ వనరులుగా మార్చుకోవాలి. వార్డు వారీగా సమస్యలను గుర్తించి, పక్కా ప్రణాళికతో ముందుకు సాగాలని సూచించారు. ఎమ్మెల్యే ధన్పాల్ సూర్యనారాయణ మాట్లాడుతూ.. ప్రజలకు సేవ చేయాలనే లక్ష్యంతోనే మీరు ఎన్నికయ్యారు. ప్రభుత్వం ప్రతిష్టాత్మకంగా చేపట్టిన 99 రోజుల ప్రజాపాలన - ప్రగతి ప్రణాళికను ప్రజల్లోకి తీసుకెళ్లాలి. శానిటేషన్ సమస్యలపై అధికారులు, ప్రజా ప్రతినిధులు ప్రత్యేక దృష్టి పెట్టాలి. సమస్యల పరిష్కారంలో నిర్లక్ష్యంగా వ్యవహరించే అధికారుల తీరును నా దృష్టికి తీసుకురండని కోరారు. ప్రజా ప్రతినిధులు మున్సిపల్ యాక్ట్ పుస్తకాన్ని క్షుణ్ణంగా చదివి, పాలనాపరమైన నియమ నిబంధనలపై అవగాహన పెంచుకోవాలని ఆయన సూచించారు. ప్రభుత్వం ఇచ్చే నిధులను ఎలా సద్వినియోగం చేసుకోవాలో ప్రణాళికాబద్ధంగా ఆలోచించాలని, కరీంనగర్, వరంగల్ వంటి నగరాలతో పోటీ పడేలా నిజామాబాద్ను అభివృద్ధి చేయాలని నాయకులు సూచించారు. ఈ శిక్షణ శిబిరంలో మేయర్ ఉమారాణి, వివిధ మున్సిపాలిటీల చైర్పర్సన్లు, కమిషనర్లు, అధికారులు పాల్గొన్నారు.
About The Author
