హున్సాలో హోలీ పిడిగుద్దులాట.. గాయాలైనా వెనకడుగు వేయని నమ్మకం

నిజామాబాద్ జిల్లా సాలూర మండలం హున్సా గ్రామంలో వందేళ్ల నాటి సంప్రదాయం పునరావృతమైంది. హోలీ పండుగను పురస్కరించుకుని ఏటా నిర్వహించే పిడిగుద్దులాట ఈసారి కూడా ఉత్సాహంగా సాగింది. బుధవారం ఉదయం నుంచే గ్రామస్తులు రంగులు చల్లుకుంటూ హోలీ సంబరాల్లో మునిగితేలారు.

సాయంత్రం గ్రామ శివారులో ఏర్పాటు చేసిన కుస్తీ పోటీలు అందరినీ ఆకట్టుకున్నాయి. అనంతరం గ్రామ హనుమాన్ ఆలయం వద్ద గ్రామస్తులు పిడిగుద్దులాటకు సిద్ధమయ్యారు.

గ్రామ పెద్దల పర్యవేక్షణలో కర్ర స్తంభాలు పాతి, తాడును గట్టిగా బిగించారు. ఆట నిబంధనల ప్రకారం గ్రామస్తులు ఒక చేతితో తాడును పట్టుకుని, మరో చేతి పిడికిలితో ప్రత్యర్థులపై గుద్దులు కురిపించారు. ఈ క్రమంలో దెబ్బలు తగిలి రక్తాలు కారినా గ్రామస్తులు ఏమాత్రం పట్టించుకోకపోవడం గమనార్హం.

కామదహనంలోని బూడిదను గాయాలపై రాసుకుంటే నొప్పులు తెలియవని, త్వరగా మానిపోతాయని వారి ప్రగాఢ విశ్వాసం. సుమారు పది నిమిషాల పాటు సాగిన ఈ రసవత్తర పోరాటాన్ని గ్రామ పెద్దలు తాడు వదిలివేయడంతో ముగించారు. ఆట ముగిసిన వెంటనే ఇరువర్గాల వారు ఆత్మీయంగా ఆలింగనం చేసుకుని పండుగ శుభాకాంక్షలు తెలుపుకోవడం విశేషం. ఎలాంటి అవాంఛనీయ సంఘటనలు జరగకుండా బోధన్ రూరల్ ఎస్సై మచ్చేందర్ రెడ్డి ఆధ్వర్యంలో పోలీస్ బందోబస్తు నిర్వహించారు.