ప్రభుత్వం ప్రతిష్టాత్మకంగా చేపట్టిన అభివృద్ధి పనులు ప్రజలకు సకాలంలో అందాలని, పనుల నాణ్యతలో రాజీ పడకుండా నిర్దేశిత గడువులోగా పూర్తి చేయాలని ప్రభుత్వ ముఖ్య సలహాదారు, ఎమ్మెల్యే శ్రీ సుదర్శన్ రెడ్డి అధికారులను ఆదేశించారు. క్షేత్రస్థాయిలో సమస్యలను తెలుసుకుంటూ, అభివృద్ధిని పరుగులు పెట్టించడమే ప్రభుత్వ లక్ష్యమని ఆయన స్పష్టం చేశారు.
శుక్రవారం నిజామాబాద్ జిల్లా రెంజల్ మండలంలోని సాటాపూర్, కందకుర్తి గ్రామాల్లో ఎమ్మెల్యే విస్తృతంగా పర్యటించారు. ఆయా గ్రామాల్లో కొనసాగుతున్న వివిధ అభివృద్ధి పనులను ఆయన స్వయంగా పరిశీలించి, పనుల పురోగతిపై అధికారులతో సమీక్షించారు.
చేపట్టిన ప్రతి పనిని నాణ్యతా ప్రమాణాలతో పూర్తి చేసి, సాధ్యమైనంత త్వరగా ప్రజలకు అందుబాటులోకి తీసుకురావాలని సూచించారు. చారిత్రక ప్రాశస్త్యం ఉన్న కందకుర్తి వంటి ప్రాంతాల్లో పర్యాటక రంగంతో పాటు భక్తి సంబంధిత సౌకర్యాల మెరుగుదలకు ప్రత్యేక కృషి చేస్తామని హామీ ఇచ్చారు. పనుల్లో ఏవైనా ఆటంకాలు ఉంటే వెంటనే తన దృష్టికి తీసుకురావాలని అధికారులకు దిశానిర్దేశం చేశారు.
