ఉగాది వేళ ఎరాజ్ పల్లిలో హోరాహోరీగా మల్లయుద్ధాలు

By R.Suresh

On 19 Mar 2026 19:23:59

ఉగాది వేళ ఎరాజ్ పల్లిలో హోరాహోరీగా మల్లయుద్ధాలు

తెలంగాణ పల్లెల్లో ఉగాది పండుగ అంటేనే ఉత్సాహం.. ఆ ఉత్సాహానికి కుస్తీ పోటీలు తోడైతే ఆ మజాయే వేరు. బోధన్ మండలంలోని ఎరాజ్ పల్లి గ్రామంలో ఉగాది పర్వదినాన్ని పురస్కరించుకుని నిర్వహించిన కుస్తీ పోటీలు అత్యంత హోరాహోరీగా సాగాయి. ఏటా ఉగాది నాడు కుస్తీలు నిర్వహించడం ఇక్కడ అనాదిగా వస్తున్న ఆనవాయితీ. ఈ పోటీల్లో తమ సత్తా చాటేందుకు వివిధ ప్రాంతాల నుంచి మల్లయోధులు భారీగా తరలివచ్చారు. యోధుల మధ్య సాగిన ఎత్తులకు పైఎత్తులు చూసి గ్రామస్తులు ఈలలు, కేకలతో మురిసిపోయారు.

పోటీల్లో గెలుపొందిన మల్లయోధులకు గ్రామ సర్పంచ్ దాసు గౌడ్, గ్రామ పెద్దలు నగదు పురస్కారాలను అందజేసి అభినందించారు. అనంతరం బాజాభజంత్రీల నడుమ గ్రామంలో ఘనంగా ఊరేగింపు నిర్వహించి హనుమాన్ మందిరానికి చేరుకున్నారు. అక్కడ పండితులచే పంచాంగ శ్రవణం గావించారు. కొత్త ఏడాదిలో గ్రామం సుభిక్షంగా ఉండాలని, ప్రజలందరూ ఆయురారోగ్యాలతో వర్ధిల్లాలని స్వామివారికి ప్రత్యేక పూజలు నిర్వహించారు. ఈ కార్యక్రమంలో గ్రామ పెద్దలు, యువకులు, వివిధ గ్రామాల ప్రజలు పెద్ద సంఖ్యలో పాల్గొన్నారు.

Views: 91

Tags: